ފައިސާ ޗާޕް ކުރުން ހުއްޓާލުމާ ގުޅިގެން އިގްތިސާދީ ހާލަތު ހަރުދަނާ ކުރުމަށް އެޅި ފިޔަވަޅުތަކުގެ އަސަރު ފެންނަމުންދާ ކަމަށާއި ކަޅު ބާޒާރުގައި ޑޮލަރުގެ ރޭޓް ތިރިވާން ފަށާފައިވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ދ. މީދޫ ރައްޔިތުންނާ އެކުގައި ބޭއްވެވި ބައްދަލުވުމެއްގައި ރައީސް ޑރ. މުއިއްޒު ވިދާޅުވީ ވެރިކަމާ ހަވާލުވެވަޑައިގެންނެވި އިރުގައި ބޭރުގެ ދަރަނީގެ ގޮތުގައި 120 ބިލިއަން ރުފިޔާ އަދި އެތެރޭގެ ދަރަނީގެ ގޮތުގައި ނުވަ ބިލިއަނަށް ވުރެ ގިނަ ރުފިޔާ ހުރި ކަމަށެވެ. އަދި ސަރުކާރުން މަސައްކަތް ކުރަނީ ދަރަނިތައް ދެއްކުމާ އެކީގައި އިގްތިސާދު ހަރުދަނާ ކުރަން ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ ސަރުކާރުގެ ކުންފުނިތައް މެދުވެރިކޮށް ދިވެހި ކުންފުނިތަކަށް ދައްކަން ޖެހޭ ފައިސާތައް ދީ، ބޭރުގެ ދަރަނި ދައްކަމުން ދަނީ ފައިސާ ޗާޕް ނުކޮށް ކަމަށެވެ. އެކަން ހުއްޓާ ނުލި ނަމަ، ރާއްޖެ ބަނގުރޫޓުވީސް ކަމަށް ވިދާޅުވި އެވެ.

"އަޅުގަނޑުމެންގެ ދިވެހި ރުފިޔާގެ އަގު ވެއްޓެމުން ވެއްޓެމުން ގޮސް އަތުގަ ނުޖެހޭ ހިސާބަށް ދާނެ، ޑޮލަރުގެ އަގު އަރައިގެންދާނެ 20 ރުފިޔާއަށް ވުރެ ވެސް މައްޗަށް. އިގުތިސާދު އެއްކޮށް ހަލާކުވީސް ފައިސާ ޗާޕް ކުރި ނަމަ." ރައީސް ވިދާޅުވި އެވެ.

ރައީސް ވިދާޅުވީ ނުވަ ބިލިއަނަށްވާ ވަރަށް ފައިސާ ޗާޕްކޮށްލި ނަމަ، އެކަން ވެސް ހައްލުވީސް ކަމަށެވެ. އެކަމަކު، ފައިސާ ޗާޕް ކުރުން ހުއްޓާލީ ވެސް ދިވެހި ރައްޔިތުންގެ ހައްގުގައި ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ ފައިސާ ޗާޕް ކުރުން ހުއްޓާލުމުގެ ހެޔޮ ނަތީޖާ ފެންނަމުންދާ ކަމަށެވެ.

"އަޅުގަނޑުމެންގެ ފައިސާގެ އަގު ހިފެހެއްޓި، ޑޮލަރުގެ ރޭޓް ތިރިވެ އިގްތިސާދު ރަނގަޅުވަމުން ދާނީ. މިހާރު އޭގެ އަސަރު ފެނޭ އެބަ،" ރައީސް ވިދާޅުވި އެވެ.

ރައީސް ޑރ. މުއިއްޒު ވިދާޅުވި ގޮތުގައި ކުރީގެ ރައީސް އަބްދުﷲ ޔާމީންގެ ވެރިކަމުގައި ދަރަނި ދައްކަން ވެގެން ހެދި ސޮވެރިން ޑިވެލޮޕްމަންޓް ފަންޑުގައި 2018 އާ ހަމައަށް ހުންނާނީ ޑޮލަރު ކަމަށެވެ. އެކަމަކު، 2023 ވަނަ އަހަރު ނިމުނު އިރު އޭގައި ޑޮލަރު ނެތް ކަމަށް އެމަނިކުފާނު ވިދާޅުވި އެވެ. މި ސަރުކާރުން ވެރިކަމަށް އައިސް އެ ފަންޑަށް ޑޮލަރު ޖަމާކުރަން ފަށާފައިވާ އިރު، މިހާތަނަށް 30 މިލިއަން ޑޮލަރު ޖަމާކޮށްފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި މި އަހަރު ނިމޭ އިރު 100 މިލިއަން ޑޮލަރު އެ ފަންޑަށް ޖަމާ ކުރެވޭނެ ކަމަށް ގަބޫލު ކުރެއްވެ އެވެ.

ރައީސް ވިދާޅުވީ ވެލާނާ އިންޓަނޭޝަނަލް އެއާޕޯޓު (ވީއައިއޭ) އަވަހަށް ނިންމުމަށް މަސައްކަތް ކުރަނީ ވެސް އިގްތިސާދު ވަރުގަދަ ކުރަން ކަމަށެވެ. ރާއްޖޭގެ އިގްތިސާދު ދެން އިތުރަށް ފުޅާކުރެވޭނީ ވެލާނާ އެއާޕޯޓް އަވަހަށް ނިންމައި ހުޅުވާލެވުނުހާ އަވަހަކަށް ކަމަށް ރައީސް ވިދާޅުވިއެވެ. އަދި އިތުރު ރިސޯޓުތައް ހެދުމުގެ ފުރުސަތު ދީ ހަދަން ފަށާފައި ނުނިމި ހުރި ރިސޯޓުތައް ނިންމަން އެކި ކަހަލަ ފުރުސަތު ދިނުމަށް ވެސް މަސައްކަތް ކުރައްވާ ކަމަށް ރައީސް ވިދާޅުވި އެވެ.

ރައީސް މުއިއްޒު ވިދާޅުވީ މަސްވެރިކަމުގެ ދާއިރާ ވެސް އޮތީ އެއްކޮށް އިނދަޖެހިފައި ކަމަށާއި މި ސަރުކާރާ ހަވާލުވިއިރު 240 މިލިއަން ރުފިޔާ މަސްވެރިންނަށް ނުދީ އޮތް ކަމަށެވެ. އެ ފައިސާ އާއި އޭގެ އިތުރަށް ވެސް 400 މިލިއަނެއްހާ ރުފިޔާ ދެއްކިއިރު، ބާކީ ހުރި ފައިސާ ދައްކަމުންދާ ކަމަށް ވިދާޅުވި އެވެ. އަދި ވައުދުވެވަޑައިގެންނެވި ގޮތަށް 48 ގަޑިއިރު ތެރޭ ފައިސާ ދޫކުރުމަށް މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.