ސަލްމާން ޚާން ހޯސްޓްކުރާ ކަލާޒް ޗެނެލްގެ ރިއަލިޓީ ޝޯ "ބިގް ބޮސް" ގެ 18 ވަނަ ސީޒަން ކުރިއަށް އޮއްވައި މި ޝޯގެ ޑިޖިޓަލް ވާޝަނެއް ޖިއޯ ސިނަމާއިން ގެނެސްދިނުމަށް އަންނަނީ ތައްޔާރުވަމުންނެވެ. އެގޮތުން އަންނަ މަހުގެ ފަހުކޮޅު "ބިގްބޮސް އޯޓީޓީ" ގެ ތިން ވަނަ ސީޒަން ފެށުމަށް ވަނީ ނިންމާފަ އެވެ.

"ބިގްބޮސް އޯޓީޓީ 3" ގެނެސްދޭ ތާރީހު ކައިރިވަމުން އަންނައިރު މިޝޯއާ ބެހޭ ގޮތުން އެކި ފަހަރު އެކި ކަހަލަ ވާހަކަތައް މީޑިއާގައި ތިލަވެގެންދެ އެވެ. އެގޮތުން މިފަހަރުގެ ސީޒަންގެ ހޯސްޓުގެ ގޮތުގައި ސަލްމާން ޚާން ނުފެންނާނެ ކަމަށް ރިޕޯޓްތައް ބުނެ އެވެ. އެއީ ސަލްމާންގެ ފިލްމުތަކުގެ ޝޫޓް ޝެޑިއުލްތައް ހުރި ގޮތުނެވެ.

"ބިގްބޮސް" އުފައްދާ ފަރާތުން މިހާރު އަންނަނީ ސަލްމާން ބަދަލުގައި މިފަހަރުގެ އޯޓީޓީ ސީޒަން ހޯސްޓް ކުރާނެ ފަންނާނެއް ހޯދުމަށް މަސައްކަތް ކުރަމުންނެވެ. އެގޮތުން "ބިގްބޮސް އޯޓީޓީ" ގެ ފުރަތަމަ ސީޒަން ހޯސްޓްގެ ގޮތުގައި ފެނިގެންދިޔަ ބޮލީވުޑްގެ ނުފޫޒު ގަދަ ޑައިރެކްޓަރު ކަރަން ޖޯހަރު ފެނިގެންދާނެ ކަމަށް ރިޕޯޓްތައް ބުނެ އެވެ.

ކަރަންގެ އިތުރުން މަޝްހޫރު އެކްޓަރުން ކަމަށްވާ އަނިލް ކަޕޫރު އަދި ސަންޖޭ ދަތުވެސް މިފަހަރުގެ ސީޒަންގެ ހޯސްޓެއް ގޮތުގައި ފެނިގެންދާނެ ކަމަށް ރިޕޯޓްތައް ބުނެ އެވެ.

އަނިލް ކަޕޫރާއި ސަންޖޭ އަދި ކަރަން

ސަލްމާން ޚާން ބިގްބޮސް ހުށައަޅައިދޭތާ މިހާރު ދިހަ އަހަރަށް ވުރެން ގިނަ ދުވަސް ވެއްޖެ އެވެ. ބިގް ބޮސްގެ ޑިޖިޓަލް އެޑިޝަންގެ އެންމެ ފަހު ސީޒަން ކަމަށްވާ ބިގް ބޮސް އޯޓީޓީ ވެސް ސަލްމާން ހޯސްޓްކުރި އެވެ.

ބިގް ބޮސް އޯޓީޓީގެ ފުރަތަމަ ސީޒަން ކަރަން ޖޯހަރު ހޯސްޓްކުރިއިރު، ބިގް ބޮސް ސީޒަން 5 ހޯސްޓްކުރި ސަންޖޭ ދަތު އެވެ. މީގެ އިތުރުން ބިގްބޮސްގެ ބައެއް އެޕިސޯޑްތައް ޑައިރެކްޓަރު ފަރާ ޚާންވެސް ވަނީ ހުށައަޅައިދީފަ އެވެ.

އެކްޓަރު ސަލްމާން ޚާން

ދިވްޔާ އަގްގަރްވާލް ބިގް ބޮސް އޯޓީޓީ ސީޒަން 1 ކާމިޔާބުކުރިއިރު، ސީޒަން 2 ގެ ޗެމްޕިއަންކަން ހޯދީ އެލްވިޝް ޔާދާވް އެވެ.