މިފްކޯގެ ސީއީއޯ އަދި މެނޭޖިން ޑިރެކްޓަރުގެ މަގާމުން ރޭ ވަކިކުރި އަހުމަދު ޝަމާހު ރަޝީދަށް ފިޝަރީޒް މިނިސްޓްރީގެ ސްޓޭޓް މިނިސްޓަރުގެ މަގާމަށް މިއަދު އައްޔަން ކޮށްފި އެވެ.

ރައީސް އޮފީހުގެ އިސް ތަރުޖަމާނު ހީނާ ވަލީދު ވިދާޅުވީ ޝަމާހު ޕިޝަރީޒް މިނިސްޓްރީގެ ސްޓޭޓު މިނިސްޓަރުގެ މަގާމަށް މިއަދު އައްޔަންކޮށްފައިވާ ކަމަށެވެ. ޝަމާހު މަގާމުން ވަކިކުރިއިރު އޭނާ ހުންނެވީ ތައިލެންޑްގެ ބެންކޮކް އޮތް މަސްވެރިކަމާ ބެހޭ ފެއާއެއްގައި ބައިވެރިވުމަށް ވަޑައިގެންނެވެ.

ޕްރައިވެޓައިޒޭޝަން ބޯޑުން ރޭ ކުރި ޓްވީޓެއްގައި ވަނީ ޝަމާހު މަގާމުން ވަކިކުރިކަން ހާމަކޮށްފަ އެވެ. އޭނާ ވަކި ކުރީ ކީއްވެގެން ކަމެއް އެ ބޯޑުން ނުބުނެ އެވެ.

ޕީސީބީން ބެލި މައްސަލައަކާ ގުޅިގެން މިދިޔަ މާޗު މަހު ޝަމާހު ސަސްޕެންޑު ކުރި އެވެ. އޭނާގެ ސަސްޕެންޝަން މިދިޔަ މަހުގެ 24 ވަނަ ދުވަހު އުވާލީ 37 ދުވަހަށް ފަހު އެވެ.

ޝަމާހުގެ ސަސްޕެންޝަނާ ގުޅޭ ގޮތުން މީގެ ކުރިން ޕީސީބީ އިން ނެރުނު ބަޔާނެއްގައި ބުނީ އޭނާއާ ގުޅުން ހުރި މައްސަލަތަކެއް ޕީސީބީއަށް ހުށަހަޅާފައިވާ ކަމަށާއި އެ މައްސަލަތަކާ ގުޅުން ހުރި ތަހުގީގެއް ފަށާފައިވާ ކަމަށެވެ.

ޝަމާހުއަށް ވަނީ މައިގަނޑު 12 ތުހުމަތެއްކޮށް އެފަދަ ކަމެއް ހިނގާ ނަމަ ވަގުތުން ހުއްޓާލުމަށް އަންގާފަ އެވެ. އޭނާގެ ސަމާލުކަމަށް އެކަންކަން ގެނައީ ޕީސީބީގެ ރައީސް ހަމްދީ އަގީލް ސޮއިކުރައްވައި ފޮނުވި ސިޓީއަކުންނެވެ.

އެ ސިޓީގައި އެންމެ ސީރިއަސް މައްސަލައެއްގެ ގޮތުގައި ފާހަގަކޮށްފައި ވަނީ މުވައްޒަފުންނަށް ބިރު ދެއްކުމެވެ. އޭގެ އިތުރުން ސީއީއޯއާ އާއިލީ ގޮތުން ގުޅުން އޮންނަ މީހުންނަށް ވަޒީފާ ދީފައިވާ ކަމަށް ތުހުމަތުކޮށްފައިވެ އެވެ.