ސަރުކާރުގެ ޚަރަދުގައި 50 މީހުން ހައްޖަށް ގެންދިޔައީ ޚާއްސަ ކޯޓާއެއްގެ ދަށުން: ޑރ. ޝަހީމް

ސަރުކާރުގެ ޚަރަދުގައި މިއަހަރު 50 މީހުން ހައްޖަށް ގެންދިޔައީ ހާއްސަ ކޯޓާއެއްގެ ދަށުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު މިހެން ވިދާޅުވިއިރު ސަރުކާރުގެ ހަރަދުގައި މީހުން ހައްޖަށް ގެންދަނީ މީގެ ކުރިން ހައްޖަށް ދިއުމަށް މޯލްޑިވްސް ހައްޖު ކޯޕަރޭޝަނަށް ފައިސާ ދައްކާފައިވާ މީހުންގެ ކިޔުއިން ފަހަތަށް ޖައްސާލުމަށްފަހު ކަމަށް ބުނެ ގިނަ ބަޔަކު ޝަކުވާކުރަމުން ދަނިކޮށެވެ.

ހައްޖަށް ފުރާވަޑައިގަތުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ބައްދަލުކުރައްވާ ވާހަކަދައްކަވަމުން ޑރ. ޝަހީމް މިއަދު ވިދާޅުވީ ސަރުކާރުގެ ޚަރަދުގައި 50 މީހުން ޙައްޖަށް ގެންދިޔައީ ފިނޭންސް މިނިސްޓްރީގެ ބަޖެޓުން ކަމަށެވެ. އަދި އެމީހުން ހައްޖަށް ފޮނުވީ ރާއްޖެއަށް ލިބުނު ރަސްމީ ކޯޓާތަކެއްގެ ދަށުން ނޫން ކަމަށާއި އެ ފަރާތްތައް ޙައްޖަށް ފޮނުވީ ރާއްޖެއަށް ލިބުނު ޚާއްސަ ކޯޓާތަކެއްގެ ދަށުން ކަމަށް އޭނާ ވިދާޅުވި އެވެ. އެގޮތުން ކޮންމެ ގައުމަކަށް ވެސް ހާއްސަ 50 ނުވަތަ 70 ކޯޓާ ސައުދީ އަރަބިއްޔާގެ ސަރުކާރުން ދޭ ކަމަށް މިނިސްޓަރު ވިދާޅުވި އެވެ.

"މިހާތަނަށް އަޅުގަނޑުމެން ބެލިބެލުމުގައި ސަރުކާރުގެ ހަރަދުގައި ހައްޖަށް ގެންދަން މީހުން އިހުތިޔާރު ކުރުމުގައި އެއްވެސް މައްސަލައެއް ނެތް. އަދި ސަރުކާރުން މި ކަންކަން ވަރަށް ގާތުން ބަލާނެ،" ޑރ. ޝަހީމް ވިދާޅުވި އެވެ.

ސަރުކާރު ޚަރަދުގައި ހައްޖަށް ފޮނުވުމުގައި އުސޫލުން ބޭރުން ޢަމަލުކޮށްފައިވާ ކަމަށް ބައެއް ފަރާތްތަކުން ތުހުމަތުކުރި ނަމަވެސް ޑރ. ޝަހީމް ވަނީ ހައްޖަށް މީހުން ފޮނުވުމުގައި އެއްވެސް ގޯހެއް ނޯންނާނެ ކަމަށް ތަކުރާރުކޮށް ވިދާޅުވެފަ އެވެ.

ރާއްޖޭން މިއަހަރު 1150 މީހުން ޙައްޖުގެ އަޅުކަން އަދާކުރަން މައްކާއަށް ދާނެކަމަށާއި އެގޮތުން ރާއްޖެއިން ހައްޖަށްދާ މީހުންގެ ފަހު ފްލައިޓު މިއަދު ސައުދީ ޢަރަބިއްޔާއަށް ވަނީ ފުރައިފަ އެވެ. އަދި ރާއްޖެއިން މިފަހަރުގެ އަމީރުލް ހައްޖުގެ ގޮތުގައި ވަޑައިގަންނަވާނީ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ކަމަށް ވެސް މިނިސްޓަރު ޝަހީމް ވިދާޅުވި އެވެ.

ފޭސްބުކްގައި ޝަހީމް ކުރެއްވި ޕޯސްޓެެއްގައި މިނިސްޓަރު ވިދާޅުވީ ސަރުކަރުގެ ހަރަދުގައި ހައްޖަށް މީހުން ފޮނުވުމަކީ ސައްހަކަމެއް ކަމަށާއި ސަރުކާރުގެ އެހީގައި ހައްޖަށް ދާ މީހާއަކީ ފަގީރަކަށްވިޔަސް ފަގީރަކަށް ނުވިޔަސް އެމީހެއްގެ ހައްޖު 100 ޕަސެންޓު ރަނގަޅު ވާނެ ކަމަށެވެ.

ޝަހީމް ވިދާޅުވީ ސަރުކާރުގެ އެހީގައި ހައްޖަށް ދިޔަ މީހުންގެ ހައްޖު ﷲގެ ވާގިފުޅާއެކު 100 އިންސައްތަ ރަނގަޅުވާނެ ކަމަށާއި ސަރުކާރަކީ ރައްޔިތުންގެ ބެލެނިވެރި ފަރާތް ކަމަށެވެ.

"ސަރުކާރުގައި ހުންނާނީ ރައްޔިތުންގެ ލާރި، ރައްޔިތުންގެ ހައްގު ހިމެނޭ ލާރި، ފަގީރަކަށްވިޔަސް އަދި ފަގީރަކަށް ނުވިޔަސް ސަރުކާރުން ނުވަތަ އެހެން މީހެއްގެ އެހީގައި ކުރާ ހައްޖަކީ 100 ޕަސެންޓު ރަނގަޅު ހައްޖެއް،" ޝަހީމް ވިދާޅުވެފައިވެ އެވެ.