ހުޅުމާލޭގައި މި މަހުގެ ތެރޭގައި މާރާމާރީއެއް ހުއްޓުވަން އުޅުނު ފުލުހެއްގެ ގައިގައި ކާރަކުން ޖެއްސުމަށްފަހު ފިލި ދެ މީހުން ވެސް ހައްޔަރުކޮށްފި އެވެ.

މި މަހު 15 ވަނަ ދުވަހު، ހުޅުމާލޭ ފިލިގަސް މަގުގައި މީހަކަށް ހަމަލާދީ ގަދަކަމުން އެ މީހާ ކާރަކަށް އަރުވަން އުޅުނު ބަޔަކު ހުއްޓުވައި އެ މީހުން ހައްޔަރުކުރަން ސީނަށް ދިޔަ ފުލުހެއްގެ ގައިގައި ކާރަކުން ޖެއްސުމަށްފަހު ދެ މީހަކު ވަނީ ފިލާފަ އެވެ. އެ މީހުން ވަނީ އެ ފުލުސް މީހާ ވެއްޓިފައި ވަނިކޮށް އޭނާގެ ފައިމަތިން ކާރު ދުއްވާފަ އެވެ.

އެ ދެ މީހުންގެ ތެރެއިން އެކަކު މީގެކުރިން ވަނީ ހައްޔަރުކޮށްފަ އެވެ. ފުލުހުންގެ މީޑިއާ އޮފިޝަލް ވިދާޅުވީ ފިލައިގެން އުޅުނު ދެވަނަ މީހާ ވެސް މިހާރު ހައްޔަރުކޮށްފައިވާ ކަމަށެވެ. އެއީ 22 އަހަރުގެ ފިރިހެނެކެވެ.

އެނގިފައިވާގޮތުގައި އެ ކާރު ފުލުހުން ބަލައި ފާސްކުރިއިރު، ތޫނު ހަތިޔާރު ވަނީ ފެނިފަ އެވެ. ފުލުހުން މިހާރު ވަނީ އެ ކާރު ޓޯކޮށްފަ އެވެ.