ބަންގްލަދޭޝްގައި މިހާރު ހިނގަމުންދާ މުޒާހަރާތަކުގައި ހަމަނުޖެހުންތަށް ބޮޑުވެފައި ވާތީ އެ ގައުމުގައި އުޅޭ އަދި އެ ގައުމަށް ދަތުރުކުރާ ދިވެހިން ސަމާލުވުމަށް ސަރުކާރުން އިލްތިމާސްކޮށްފި އެވެ.

ބަންގްލްދޭޝްގައި ސަރުކާރު ވަޒީފާތަކަށް މީހުން އައްޔަން ކުރުމުގައި އަމަލު ކުރަމުންދާ ކޯޓާ ނިޒާމާ ދެކޮޅަށް ކުރަމުންދާ މުޒާހަރާތަކުގައި ހަމަނުޖެހުން ބޮޑުވެ އިއްޔެއާ ހަމައަށް ވަނީ 19 މީހުން މަރުވެ އެތައް ސަތޭކަ ބަޔަކަށް އަނިޔާވެފަ އެވެ.

ފޮރިން މިނިސްޓްރީން ބުނީ މިދަނޑިވަޅުގައި ގެއިން ބޭރަށް ނުނުކުތުމަށާއި ބަންގްލަދޭޝް ސަރުކާރާއި ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށް އިލްތިމާސްކުރާ ކަމަށެވެ.

ބަންގްލަދޭޝްގައި ދިރިއުޅޭ ދިވެހި ކިޔަވާކުދިންނާއި ދިރިއުޅޭ ދިވެހިންގެ ސަލާމަތާއި ރައްކާތެރިކަން ކަށަވަރުކުރުމަށް ދިވެހި ސަރުކާރުން އަންނަނީ މަސައްކަތް ކުރަމުން ކަމަށް ވެސް ފޮރިން މިނިސްޓްރީން ބުނެ އެވެ.

މިކަމުގައި އެއްވެސް އެހީތެރިކަމެއް ބޭނުންވާނަމަ، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް ފޮރިން މިނިސްޓްރީން އެދެ އެވެ. ގުޅޭނެ ނަމްބަރުތަކަކީ 8801329748885+ ނުވަތަ 8801708120318+ އެވެ.

ބަންގްލަދޭޝް އަކީ މެޑިސިން ދާއިރާއިން ކިޔަވާ ގިނަ ދިވެހި ދަރިވަރުން އުޅޭ ގައުމެކެވެ.