ރާއްޖޭގެ ގައުމީ އެއާލައިން މޯލްޑިވިއަންގެ ބަންގްލަދޭޝް ދަތުރުތައް ކެންސަލްކޮށްފި އެވެ.

މޯލްޑިވިއަންއިން ބުނީ ބަންގްލަދޭޝްގެ ހާލަތު ގޯސްވުމާ ގުޅިގެން ފްލައިޓް އޮޕަރޭޓް ނުކުރެވި، ބަންގްލަދޭޝްގެ ވެރިރަށް ޑާކާއަށް ކުރާ ދަތުރުތައް މިއަދު ކެންސަލްކޮށްފައިވާކަމަށެވެ. މޯލްޑިވިއަންއިން ދަނީ ހާލަތު ވަރަށް ގާތުން ބަލަމުން ކަމަށާއި މި ދަނޑިވަޅުގައި ފަސިންޖަރުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުން ދާމަކަމަށް މޯލްޑިވިއަންއިން ބުނެ އެވެ.

އިތުރު މައުލޫމާތާއި އެހީތެރިކަން ހޯއްދެވުމަށް 1671 ނަންބަރު ފޯނަށް ގުޅުއްވުމަށް ނުވަތަ [email protected]އަށް އީމެއިލް ކުރެއްވުން އެ އެއާލައިނުންއެދެ އެވެ. ޑާކާގައި ތިބި ފަސިންޖަރުންނަށް 8801621211316+ އަށް ގުޅުއްވޭނެކަމަށް މޯލްޑިވިއަންއިން ބުނެ އެވެ.

ވަޒީފާގެ ކޯޓާ މައްސަލައިގައި ޖުލައި މަހު ބަންގްލަދޭޝްގައި ކުރަންފެށި މުޒާހަރާގައި 200 އަށް ވުރެ ގިނަ މީހުން މަރުވިފަހުން، ބޮޑުވަޒީރު އިސްތިއުފާއަށް ގޮވާލާ މުޒާހަރާތައް ވަރުގަދަކުރުމުން އިއްޔެ އެ ގައުމުގެ ބޮޑުވަޒީރު ޝެއިޚް ހަސީނާ ވަނީ އިސްތިއުފާ ދެއްވުމަށްފަހު ފިއްލަވައިފަ އެވެ. މިހާރު އެގައުމުގެ އަސްކަރިއްޔާއިން ވަނީ ވަގުތީ ސަރުކާރެއް އެކުލަވާލާފަ އެވެ.

ބަންގްލަދޭޝްގައި ތިބި ދިވެހިން ސަމާލުވުމަށް ފޮރިން މިނިސްޓްރީން ތަކުރާރުކޮށް ވަނީ އިލްތިމާސްކޮށްފަ އެވެ.