ބޮލީވުޑްގެ ޒުވާން ތަރި ކިއާރާ އަދްވާނީއަކީ މިހާރު އެ ދާއިރާގައި ނަންކިޔާ އަންހެން ތަރިންގެ ތެރެއިން އެކެކެވެ. ކިއާރާގެ ކާމިޔާބު މަސައްކަތްތަކުގެ އިތުރުން އޭނާގެ ބުރުސޫރައާއި ފުރިހަމަ ހަށިގަނޑަކީ ގިނަ ބަޔަކު ފާހަގަކުރާ ކަންކަމެވެ.

ލޫޅާފަތި ރީތި ހަށިގަނޑެއް ދަމަހައްޓަން ކިއާރާ ބޮޑު އިސްކަމެއް ދޭއިރު އެކަމުގައި ކެއިންބުއިމަށް ބެލުމާއި ކަސްރަތު ކުރުން ވެސް ހިމެނެ އެވެ.

ކީޓޯ ޑައިޓު ނުވަތަ އިންޓަމިޓެންޓް ފާސްޓިން ފަދަ މަޝްހޫރު ޑައިޓެއް ނުގެންގުޅުނު ނަމަވެސް ކެއިންބުއިމުގައި ކިއާރާ އެންމެ އިސްކަން ދޭ ކަމަކީ ކާ މިންވަރު ކޮންޓްރޯލް ކޮށްގެން ގޭގައި ތައްޔާރުކުރާ ކެއުންތައް ކެއުމެވެ.

މީގެ އިތުރުން ވެސް ހަރަކާތްތެރިވެ އުޅުމަކީ ކިއާރާގެ ޑައިޓުގައި ހިމެނޭ މުހިއްމު ކަމެކެވެ. އެގޮތުން ދުވުމާއި ފެތުން އަދި ޖިމް ކަސްރަތު ފަދަ ކަންކަމަށް އޭނާ ވަގުތު ހުސްކުރެ އެވެ.

ޖިސްމާނީ ސިއްހަތުގެ އިތުރުން ނަފްސާނީ ސިއްހަތު ވެސް ދުޅަހެޔޮކޮށް ބެހެއްޓުމަށް ކިއާރާ ފަރުވާތެރިވެ އެވެ. އެގޮތުން ވީ ވަރަކުން ޔޯގާގެ ކަސްރަތުތައް ކުރާ ކަމަށް ވެސް ކިއާރާ ބުންޏެވެ.

ކިއާރާގެ ކުރިއަށް ހުރި ފިލްމީ މަސައްކަތްތަކަށް ބަލާއިރު ތެލުގޫ ފިލްމު "ގޭމް ޗޭންޖާ"އާއި ބޮލީވުޑްގެ "ޑޮން 3" އަދި "ވާ 2" ހިމެނެ އެވެ.