އިންޑިއާގެ ބެންގަލޫރުގެ ދެ ހޮސްޕިޓަލަކަށް ސަރުކާރުން ފައިސާ ނުދައްކާތީ އެ ދެ ހޮސްޕިޓަލަށް އާސަންދައިގެ ދަށުން، ބަލި މީހުން ފޮނުވުން ވަގުތީ ގޮތުން މެދުކަނޑާލައިފި އެވެ.

ހިދުމަތް ވަގުތީ ގޮތުން މެދުކަނޑާލީ ބެންގަލޫރުގެ އެސްޓާ ސީއެމް އައި ހޮސްޕިޓަލާއި ސައިޓް ކެއާ ހޮސްޕިޓަލް ޕްރައިވެޓް ލިމިޓެޑަށެވެ.

އާސަންދައިގެ މެނޭޖިން ޑިރެކްޓަރު އާމިނަތު ޒީނިޔާ ވިދާޅުވީ، އެ ދެ ހޮސްޕިޓަލުން އެފަދައިން ނިންމީ ޕެންޑިން ޕޭމަންޓްތަކަކާ ގުޅިގެން ކަމަށެވެ. މާނައަކީ އާސަންދައިން އެ ދެ ހޮސްޕިޓަލަށް ދޭންޖެހޭ ފައިސާ ނުދީ ހުރުމުންނެވެ.

އެ ދެ ހޮސްޕިޓަލްގެ އިތުރުން އިންޑިއާގެ މަނިޕާލް ހޮސްޕިޓަލުން ވެސް މިހާރު އާސަންދައިގެ ހިދުމަތް ނުލިބެ އެވެ. އެ ހޮސްޕިޓަލުން ސިއްހީ ފަރުވާދޭ އަގުތައް ބޮޑުކަމުން، އެ ހޮސްޕިޓަލަށް އާސަންދަ ދިނުން މީގެ މަހެއް ކުރިން މެދުކަނޑައިލީ އެވެ.

އާސަންދައިން އަންނަނީ މަނިޕާލް ހޮސްޕިޓަލުގެ އަގުތައް މުރާޖައާ ކުރަމުންނެވެ.

ބޭރުގެ 57 ހޮސްޕިޓަލަކުން އާސަންދައިގެ ހިދުމަތް ދިނުމަށް އާސަންދަ ކުންފުންޏާއި އެ ހޮސްޕިޓަލްތަކާ އެކު ވަނީ އެއްބަސްވެފަ އެވެ. އޭގެ ތެރޭގައި ހިމެނެނީ އިންޑިއާގެ 49 ހޮސްޕިޓަލަކާއި ސްރީލަންކާގެ އަށް ހޮސްޕިޓަލެކެވެ.

ބެންކޮކާއި ދުބާއީ ފަދަ ގައުމުތަކުގެ ހޮސްޕިޓަލްތަކުން އާސަންދައިގެ ހިދުމަތް ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. ނަމަވެސް މިހާތަނަށް އެ ވައުދު ފުއްދިފައިނުވާތީ ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ.