ގައުމިއްޔަތުގެ ނަމުގައި ވިޔަސް ދިވެހީންގެ މެދުގައި ބައިބައިވުން އުފައްދައި، ފިތުނައާއި ނަފުރަތު ފަތުރަން ޖާގަ ދީގެން ނުވާނެ ކަމަށް އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެ އެވެ.

ގައުމީ ދުވަހުގެ ތަހުނިޔާ ފޮނުއްވައި މިއަދު އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ދިވެހި ގައުމިއްޔަތު ބިނާވެފައިވަނީ އެކުވެރިކަމާއި އެއްބައިވަންތަކަމުގެ މައްޗަށް ކަމަށެވެ. އަދި ދިވެހީންނަކީ އެއް ދީނެއްގައި ތިބި، އެއް ބަހަކުން ވާހަކަދައްކާ، އެއް ނަސްލެއްގެ ބައެއްކަން ފާހަގަކުރެއްވި އެވެ. މިއީ ދުނިޔޭގެ މަދުބަޔަކަށް ނޫނީ ލިބިފައިނުވާ މަތިވެރި ނަސީބެއްކަމަށް ޝާހިދު ވިދާޅުވި އެވެ.

ގައުމިއްޔަތުގެ ނަމުގައިވިޔަސް ދިވެހީންގެ މެދުގައި ބައިބައިވުން އުފައްދައި، ފިތުނައާއި ނަފުރަތު ފެތުރުމަށް ޖާގަ ދެވިގެންނުވާނެ ކަމަށާއި އެކަންވެގެންދާނީ ގައުމިއްޔަތަށް އޮތް އެންމެ ބޮޑު ނުރައްކަލަށް ކަމަށް ވެސް ޝާހިދު ވިދާޅުވި އެވެ.

ރާއްޖޭގައި ގައުމީ ދުވަސް ފާހަގަކުރަމުން އަންނަނީ، މުހައްމަދު ތަކުރުފާނު ޕޯޗުގީޒުންގެ އަޅުވެތިކަމުން ރާއްޖެ ސަލާމަތްކޮށްދެއްވުމުގެ ޒިކުރާ އައުކުރުމުގެ ގޮތުން ކޮންމެ އަހަރަކު ވެސް ރަބީޢުލްއައްވަލް މަހުގެ 1 ވަނަ ދުވަހުގަ އެވެ.