އިންޑިއާގެ ވެރިކަން ކުރާ ބާރަތިޔާ ޖަނާތާ ޕާޓީ (ބީޖޭޕީ) ގެ ރައީސް ޖަގަތު ޕްރަކާޝް ނައްޑާ އާ މިއަދު ބައްދަލުކުރައްވައި ޕީއެންސީ އާއި އެ ޕާޓީއާ ދެމެދު ގުޅުން ބަދަހިކުރަން ރައީސް ޑރ. މުހައްމަދު މުއިއްޒު މިއަދު މަޝްވަރާ ކުރައްވައިފި އެވެ.

އިންޑިއާގެ ޔޫނިއަން މިނިސްޓަރުކަން ވެސް ކުރައްވާ ނައްޑާ އާ ރައީސް މުއިއްޒު ބައްދަލު ކުރެއްވީ އިންޑިއާ ނޫން އެހެން ގައުމުތަކުގެ ސިޔާސީ ޕާޓީތަކާ ގުޅުން ބަދަހި ކުރުމަށް ބީޖޭޕީން ގެންގުޅޭ ސިޔާސަތުގެ ދަށުންނެވެ.

ނައްޑާ އެކްސްގައި ވިދާޅުވީ މިއަދުގެ ބައްދަލުވުމުގައި ބީޖޭޕީ އާއި ޕީއެންސީގެ ގުޅުން ބަދަހި ކުރަން މަޝްވަރާ ކުރެވުނު ކަމަށެވެ.

"އަޅުގަނޑުމެންގެ ޕާޓީތަކުގެ ގުޅުން ބަދަހިކުރުމަށާއި، ދެ ޕާޓީގެ ލީޑަރުންގެ ވަފުދުތައް، އެއް ބަޔަކު އަނެއް ބަޔަކަށް ޒިޔާރަތްކުރުމަށާއި ދެ ފަރާތުގެ ހުރި އެއްގޮތް ވިސްނުންތަކާ ގުޅޭ ވާހަކަތައް ދެކެވުނު، އިންޑިއާ އާއި ދިވެހިރާއްޖެ އާ ދެމެދު ގުޅުން ވަރުގަދަ ކުރުމާ ބެހޭގޮތުން އަޅުގަނޑުމެން ދެއްކި ވާހަކަތަކުކުން ދައްކުވައިދެނީ އެއްބާރުލުން އިތުރުކުރުމަށް މަގުފަހިކޮށްދޭ ވަރުގަދަ ޕާޓްނާޝިޕަކަށް ދެފަރާތުން ވެސް ބޭނުންވާކަން،" ނައްޑާ ވިދާޅުވި އެވެ.

މި ބައްދަލުވުމާ ގުޅޭގޮތުން ޕީއެންސީން ވެސް އަދި ރައީސް އޮފީހުން ވެސް ވަކިއެއްޗެއް ހާމައެއް ނުކުރެ އެވެ. އެކަމަކު މި ބައްދަލުވުމުގެ ފޮޓޯތައް ރައީސް އޮފީހުގެ ވެބްސައިޓްގައި ވަނީ ހިއްސާކޮށްފަ އެވެ.

ރައީސް މުއިއްޒު ބީޖޭޕީގެ ރައީސްއާ ބައްދަލުކުރައްވަނީ --- ފޮޓޯ: ރައީސް އޮފީސް

އެ ބައްދަލުވުމާ ގުޅޭގޮތުން އިންޑިއާގެ ނޫސްތަކުގައި ރިޕޯޓްކޮށްފައިވާގޮތުގައި ބީޖޭޕީގެ ހިންގުމުގެ އޮނިގަނޑާއި އެ ޕާޓީގެ ހަރަކާތްތަކާ ގުޅޭގޮތުން ރައީސް މުއިއްޒަށް ނައްޑާ މައުލޫމާތު ހިއްސާކުރެއްވި އެވެ.

މި ސަރުކާރުގެ އިސް ބޭފުޅުން އިދިކޮޅުގައި ތިއްބެވިއިރު، ބީޖޭޕީއަށް ވަރަށް ބޮޑަށް ފާޑުވިދާޅުވެފައިވެ އެވެ. އެގޮތުން އެ ޕާޓީގެ އިސްވެރިން މުސްލިމުންނާ ދެކޮޅު ވިސްނުން ގެންގުޅޭ ބައެއް ކަމަށް ބުނެ ފާޑުވެސް ކިޔާފައިވެ އެވެ.