ބޮލީވުޑްގެ މަޝްހޫރު ތަރި މިތުން ޗަކްރަބަތީގެ ހަމުގެ ކުލަ ކަޅުވުމުން ބޮލީވުޑްގައި މާ ބޮޑު ކުރިއެރުމެއް ނުލިބޭނެ ކަމަށް ބައެއް މީހުން އޭނާގެ ގާތުގައި ބުނިކަމަށް މިތުން ބުނެފި އެވެ.

މިދިޔަ އަންގާރަ ދުވަހު އޮތް އިންޑިއާގެ ގައުމީ ފިލްމު އެވޯޑްސްގައި ލިބުނު ޝަރަފެއް ގަބޫލު ކުރަމުން މިތުން ބުނީ ބޮލީވުޑްގައި އޭނާގެ ފުރަތަމަ ދުވަސްކޮޅު ހަމުގެ ކުލައިގެ ސަބަބުން ގިނަ ގޮންޖެހުންތަކެއް ކުރިމަތިވި ކަމަށެވެ.

"ހަމުގެ ކުލަ ކަޅު މީހުންނަށް ބޮލީވުޑްގައި މާ ގިނަ ފުރުސަތުތަކެއް ނުލިބޭނެ ކަމަށް ވަރަށް ގިނަ މީހުން ބުނި. އެއް ދުވަސްވަރެއްގައި ދުއާވެސް ކުރިން ހަމުގެ ކުލަ ބަދަލު ކުރައްވާތޯ" މިތުން ބުންޏެވެ.

އެހެން ނަމަވެސް ފަހުން ފަހުން އައިސް އެއީ އޭނާއަށް މާ ބޮޑު ކަމަކަށް ނުވާ ކަމަށާއި އޭގެ ބަދަލުގައި ސަމާލުކަން ދިނީ އޭނާގެ ނެށުމާއި އެކްޓިންގެ ހުނަރު ކުރިއަރުވަން ކަމަށް ވެސް މިތުން ބުނެފައިވެ އެވެ.

"އަހަރެން ގަސްދުކުރީ ހުނަރުތައް ކުރިއަރުވައިގެން އަހަރެންގެ ހަމުގެ ކުލައަކީ މައްސަލައަކަށް ނުވާވަރު ކުރަން" މިތުން އިތުރަށް ބުނެފައިވެ އެވެ.

70 ވަނަ ގައުމީ ފިލްމް އެވޯޑްގައި މިތުންއަށް އަރުވާފައިވަނީ ދާދާސާހެބް ފަލްކޭ އެވޯޑެވެ. މިއީ އިންޑިއާގެ މުނިފޫހި ފިލުވުމުގެ ދާއިރާގައި ދެވޭ އެންމެ މަތީ ޝަރަފެވެ.

1976 ވަނަ އަހަރު ބޮލީވުޑަށް ތައާރަފްވި މިތުންއަކީ 70ގެ އަހަރުތަކާއި 80ގެ އަހަރުތަކުގައި ބޮލީވުޑްގެ ފިރިހެން ތަރިންގެ ތެރެއިން އެންމެ ކުރީ ސަފުގައި ހިމެނޭ ތަރި އެކެވެ.