45 އަހަރުން ދަށުގެ އަންހެނުން މަހުރަމަކާ ނުލާ އުމްރާއަށް ނުދެވޭގޮތަށް ރާއްޖެއިން އުމްރާއަށް މީހުން ގެންދިއުމާ ބެހޭ އުސޫލު އެކުލަވާލައިފި އެވެ.

އިސްލާމިކް މިނިސްޓްރީން ބުނެފައިވަނީ މި އުސޫލު އެކުލަވާލާ ގެޒެޓްކުރުމުގެ ބޭނުމަކީ މީހުން އުމްރާއަށް ގެންދާ ފަރާތްތަކާއި، އުމްރާވެރީންގެ ހައްގުތައް ހިމާޔަތްކޮށް އުމްރާއަށް ދާން ބޭނުންވާ ދިވެހި ރައްޔިތުންގެ ފައިސާ ރައްކާތެރިކަމާއިއެކު ބެލެހެއްޓޭނެ ގޮތްތަކާއި، ފެންވަރު ރަގަނޅު ހިދުމަތްތައް ލިބޭނެ ފަދަ އިންތިޒާމެއް ހަމަޖައްސައިދިނުމުގެ މަގްސަދުގައި އެކުލަވާލައިފަވާ އުސޫލެއް ކަމަށެވެ.

އެގޮތުން އެ އުސޫލުގައި ބުނެފައިވަނީ އުމުރުން 45 އަހަރުން ދަށުގެ އަންހެނުން މަހުރަމަކާ ނުލާ އުމްރާއަށް ގެންގޮސްގެން ނުވާނެ ކަމަށެވެ. އަދި 18 އަހަރުނުވާ ފިރިހެންކުދިން ބެލެނިވެރިއަކާއި ނުލައި އުމްރާއަށް ގެންގޮސްގެން ނުވާނެ ކަމަށް ވެސް އެ އުސޫލުގައިވެ އެވެ.

ޖިސްމާނީ އަދި ނަފްސާނީ ގޮތުން ނުވަތަ ސިއްހީ ގޮތުން އުމްރާގެ އަޅުކަން އަދާކުރުމަށް ކުޅަދާނަ ވެގެންނުވާކަމަށް ކުންފުންޏަކަށް ފެންނަ ފަރާތެއް އެހީތެރިއަކާއި އެކު ގެންދާގޮތަށް ނަމަވެސް އެ ފަރާތަށް އުމްރާގެ އަޅުކަން އަދާކުރެވޭނެކަމަށް ދިވެހި ސަރުކާރު ގަބޫލުކުރާ ސިއްހީ ހިދުމަތްދޭ މަރުކަޒަކުން ދޫކޮށްފައިވާ ލިޔުމަކާއި އެކު ނޫނީ އުމްރާއަށް ނުގެންދިޔުމަށްވެސް އުސޫލުގައިވެ އެވެ.

މީގެ އިތުރުން ހިދުމަތްތަކާއި އެކަށީގެންނުވާ އަގެއް އުމްރާއަށް ދާ ފަރާތްތަކުގެ އަތުން ނުނެގޭނެކަމަށްވެސް ބުނެފައިވެ އެވެ.

އުމުރާގެ އުސޫލު އެކުލަވާލާ މިއަދު ގެޒެޓްކޮށްފައިވާއިރު، ދިވެހިން އެންމެ ގިނައިން އުމްރާއަށް ގެންދާ އެއް އުމުރާ ގުރޫޕަކީ އިސްލާމިކް މިނިސްޓަރު މުހައްމަދު ޝަހީމް އަލީ ސައީދުގެ މަސްލަހަތު އޮންނަ އުމުރާ ގުރޫޕެކެވެ.