ރާއްޖޭގެ މިނިވަންކަމަށް ބުރޫ އަރާނެފަދަ އެއްވެސް ކަމެއް މި ސަރުކާރުން ކޮށްފައިނުވާނެ ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވެއްޖެ އެވެ.

ރައީސް މުހައްމަދު މުއިއްޒު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅާ ގުޅޭ ގޮތުން މީޑިއާތަކަށް މައުލޫމާތު ދެއްވަމުން ޣައްސާން ވިދާޅުވީ ރާއްޖޭގެ މިނިވަންކަމަށް ބުރޫ އަރާނެފަދަ އެއްވެސް ކަމެއް ރައީސް ނުކުރައްވާ ކަމަށެވެ.

ދިވެހިންގެ ފުރިހަމަ ސިޔާދަތީ ބާރު ގެއްލޭފަދަ ނުވަތަ ނުރައްކާވާ ފަދަ ކަމެއް ހިމެނޭ އެއްވެސް އެއްބަސްވުމެއްގައި ރައީސް ސޮއި ނުކުރައްވާކަމަށާއި އެއްބަސްވުންތަކުގައި އެއްވެސް ސިއްރެއް ނުވާނެ ކަމަށް ޣައްސާން ވިދާޅުވި އެވެ.

ޣައްސާން މިހެން ވިދާޅުވެފައި މިވަނީ ރައީސް މުއިއްޒުގެ ދަތުރުފުޅުގައި އިންޑިއާއާއެކު ގިނަ އެއްބަސްވުން ތަކެއްގައި ސޮއިކުރެއްވުމާއި ގުޅިގެން ރައްޔިތުންގެ ފާޑުކިޔުންތައް އަމާޒުވެފައިވާ ދަނޑިވަޅެއްގަ އެވެ.

އޭނާ ވިދާޅުވީ ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލު ހިމާޔަތްކުރާނީ މޯލްޑިވްސް ނެޝަނަލް ޑިފެންސް ފޯސްއިން ދިވެހި ރައްޔިތުން ބޭނުންވާ ގޮތަށްކަށެވެ. ޣައްސާން ވިދާޅުވީ ދިވެހި އަސްކަރިއްޔާގެ ގާބިލުކަން އިތުރުކުރުމުގެ މަސައްކަތް ރައީސް މުއިއްޒު ކުރައްވަމުން ގެންދަވާ ކަމަށެވެ.

މި ސަރުކާރުން އިންޑިއާ ސިފައިން ފޮނުވާލި މައްސަލައަށް އިޝާރާތް ކުރައްވަމުން ޣައްސާން ވިދާޅުވީ މިވަގުތު ރާއްޖޭގައި ތިބީ އިންޑިއާގެ ސިވިލިއަނުން ކަމަށާއި އެމީހުން ވެސް ތިބޭނީ ދެ ގައުމުގެ ދެމެދުގައި ބަދަލުކުރެވިފައި ލެޓާ އޮފް އެކްޗޭންޖުގައިވާ މުއްދަތަށް ކަމަށެވެ.

އިންޑިއާއަކީ ރާއްޖެއާ ޒަމާނުއްސުރެ ގާތް ގުޅުމެއް ބާއްވައި ގައުމަކަށްވާތީ މިފަހަރު ފެނިގެން މިދިޔައީ ޑިޕްލޮމެޓިކް ރީތި އުސޫލުގެ ދަށުން އިންޑިއާ އާ ވާހަކަ ދައްކައިގެން ދިވެހިންނަށް އެންމެ ރަނގަޅު ގޮތް ހޯދައިދެއްވި މަންޒަރުކަމަށް ޣައްސާން ވިދާޅުވި އެވެ.

ފާހަގަކޮށްލެވޭ ގޮތުގައި، ޑިފެންސް މިނިސްޓަރު ޣައްސާންވެސް ހިމެނިވަޑައިގަންނަވާ ގޮތަށް ވެރިކަމަށް އައުމުގެ ކުރިން އިދިކޮޅުގައި ތިއްބެވިއިރު ކުރީގެ ސަރުކާރުން އިންޑިއާ އެކު ހެދި ހުރިހާ އެއްބަސްވުންތަކަށް ވަރަށް ބޮޑަށް ފާޑުކިޔާފައިވެ އެވެ. އެ އެއްބަސްވުންތަކުގެ ސަބަބުން ރާއްޖޭގެ މިނިވަންކަމާއި ސިޔާދަތަށް އަސަރުކުރާނެކަމަށް އޭރު ބުނިނަމަވެސް މިހާރު ހަމަ އެފަދަ އެއްބަސްވުންތަކުގައި މައްސަލައެއް ނެތްކަމަށް ސަރުކާރުގެ އިސްވެރިން ދަނީ ބުނަމުންނެވެ.