ރާއްޖޭގައި ވޭޕް ބޭނުންކުރުން މަނާކުރަން ކުރަންޖެހޭ އެންމެހައި ކަންކަން ކުރުމަށް ރައީސް ޑރ. މުހައްމަދު މުއިއްޒު ކަމާބެހޭ އިދާރަތަކަށް އަންގަވައިފި އެވެ.

އެކްސްގައި ރައީސް މުއިއްޒު ކުރެއްވި ޕޯސްޓެއްގައި ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ މަހުގެ 15 އިން ފެށިގެން މަނާ ކުރަން ނިންމާފައިވާ ކަމަށެވެ.

އެމަނިކުފާނު ވިދާޅުވީ ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން އަންނަ ޑިސެމްބަރު މަހުގެ 15 ވަނަ ދުވަހުން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އެމަނިކުފާނު އަންގަވާފައިވާ ކަމަށެވެ.

ބަންޑާރަނައިބު އަހްމަދު އުޝާމް އެކްސްގައި ވިދާޅުވީ ރައީސްގެ ނިންމެވުން ތަންފީޒުކުރުމަށްޓަކައި ގާނޫނުތަކަށް ގެންނަންޖެހޭ އިސްލާހުތައް މިހަފްތާގެ ތެރޭގައި މަޖިލީހަށް ފޮނުވުމަށް ކުރަންޖެހޭ މަސައްކަތް ކުރަމުން އަންނަ ކަމަށެވެ. އެގޮތުން ދުންފަތް ކޮންޓްރޯލްކުރުމާބެހޭ ގާނޫނާއި ދިވެހިރާއްޖޭގެ އެކްސްޕޯޓް އިމްޕޯޓް ގާނޫނަށް އިސްލާހު ގެނައުމަށް މަޖިލީހަށް ހުށަހެޅުމަށް ވާނީ ނިންމާފައި ކަމަށް އޭނާ ވިދާޅުވި އެވެ.

ރައީސް މިފަދައިން ނިންމެވީ ސިއްހީ ޖަމިއްޔާތަކާއި ކުޅިވަރު ޖަމިއްޔާތަކުން ވޭޕް ބޭނުންކުރުމުގެ ނުރައްކާތެރިކަން ބަޔާންކޮށް އެކަން ރާއްޖޭގައި މަނާކޮށްދިނުމަށް އެމަނިކުފާނުގެ ކިބައިން އެދިފައިވަނިކޮށެވެ.

ކުޅިވަރު ޖަމިއްޔާތަކުން ބުނީ ވޭޕް ބޭނުންކުރުމުގެ ސަބަބުން ކުޅުންތެރިންގެ ޕާފޯމަންސަށް ވެސް ބޮޑެތި ބަދަލުތަކެއް އަންނަ ކަމަށެވެ. ނަތީޖާއެއްގެ ގޮތުން ރާއްޖޭގައި ކުޅިވަރުން މަތީ ވަނަތައް ހޯދަން ކުރާ މަސައްކަތްތަކަށް ހުރަސްއެޅޭ ކަމަށް އެ ޖަމިއްޔާތަކުން ބުންޏެވެ.