2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިޤްތިޞާދީ އިސްލާހީ އެޖެންޑާގެ ދަށުން، ދައުލަތުގެ ހަރަދުތައް ކުޑަކުރުމުގެ ގޮތުން ގިނަ ފިޔަވަޅުތަކެއް އެޅުމަށް ނިންމައިފި އެވެ.

ރައީސް މުއިއްޒު ދެންމެ ކުރެއްވި އެކްސް ޕޯސްޓެއްގައި އަޅުއްވަން ނިންމެވި ފިޔަވަޅުތަކުގެ ތަފްސީލު ވަނީ ހިއްސާ ކުރައްވާފަ އެވެ.

މިގޮތުން މުސާރައާއި ގުޅޭ ގޮތުން ތިރީގައިވާ ފިޔަވަޅުތައް 2 އަހަރު ދުވަހުގެ މުއްދަތަށް އެޅުމަށްވަނީ ނިންމާފަ އެވެ.

1. ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން %10 އުނިކުރުން.

2. ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން %10 އުނިކުރުން. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން. (މިހާރު 100،000ރ އަށްވުރެ ބޮޑު މުސާރަ ބައެއް ކުންފުނި ތަކުގެ މުސާރަ އޮނިގަނޑު އޮތްގޮތުން ލިބޭ)

3. މިނިވަން މުައައްސަސާތަކުގެ އިސްވެރިންގެ މުސާރައިން %10 އުނިކުރުމަށް ކަމާބެހޭ ފަރާތްތަކަށް ހުށަހެޅުން.

4. ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން %10 އުނިކުރުމަށް އެ ފަރާތްތަކުގައި އެދުން. މަތީގައިވާ ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާކުރުން. މީގެ އިތުރުން ރައީސްގެ މުސާރައިގެ %50 ނުނަގާ ގޮތަށް ހަމަޖެއްސުން.

ހަރަދުތައް ކުޑަކުރެއްވުމުގެ ގޮތުން ސަރުކާރުން ވަނީ 228 ސިޔާސީ މުވައްޒަފުން މަގާމުން ވަކިކުރަންވެސް ނިންމާފަ އެވެ. ނަމަވެސް ވަކި ކުރާ މުވައްޒަފުންނަށް ކުންފުނިތަކުން ވަޒީފާ ހަމަޖައްސަމުން ދާކަމަށް ބައެއް ފަރާތްތަކުން ބުނެ އެވެ.

ރާއްޖޭގެ މާލީ ހާލަތު ދައްވެ ހަރަދުތައް ކުޑަކުރަން އަވަސް ފިޔަވަޅުތަކެއް އެޅުމަށް މާލީ އިދާރާތަކުން ދަނީ އަންގަމުންނެވެ.