މި ފެންނަނީ އިތުރު ކުރި ސިޔާސީ މަގާމުތަކަށް މުސާރަދޭން ވެގެން ދައުލަތުގެ އެހެން ހުރިހާ މުވައްޒަފުން ގުރުބާންވާން ޖެހޭތަން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އަމީރު އެކްސްގައި ކުރެއްވި ޕޯސްޓެއްގައި ވިދާޅުވީ މިއަދު ރާއްޖެ އިން މި ފެންނީ ބައެއްގެ ނާގާބިލްކަމުން އަމިއްލައަށް ނެތް ހާލަތެއް އުފައްދައިގެން އޭގެއިން އަރައިނުގަނެވިގެން އުޅޭތަން ކަމަށެވެ. އަދި ދުނިޔެ އޮތީ އިގްތިސާދީ ބޮޑު ކާރިސާއެއްގައެއް ނޫން ކަމަށާއި ކޮވިޑް-19 ފަދަ އާލަމީ ވަބާއެއް ވެސް ނެތްއިރު، ރާއްޖެ މިހާލަތަށް ދިއުމުން އެކަމާ އޭނާ ކަންބޮޑުވުން ފާޅުކުރެއްވި އެވެ.

އަމީރު މިހެން ވިދާޅުވެފައި މިވަނީ ސަރުކާރުން ބައެއް މުވައްޒަފުންގެ މުސާރަ 10 ޕަސެންޓް ކުޑަކުރަން ނިންމައި އެކަން އިއްޔެ އިއުލާން ކުރުމާ ގުޅިގެންނެވެ.

ރައީސް ވަނީ ސިޔާސީ މުވައްޒަފުންގެ މުސާރަ އާއި ސަރުކާރު އިސްވެރިންނާއި ކުންފުނިތަކުގެ މުވައްޒަފުން ހިމެނޭހެން މުސާރަ ކުޑަކުރަން ނިންމަވާފަ އެވެ.

މިކަމާ ގުޅިގެން އަމީރު ވިދާޅުވީ ކޮންމެ މަހަކު ވެސް ދައުލަތަށް ހަރަދު ހަމަޖެއްސޭ ވަރަށް ފައިސާ ވަންނަ ކަމަށާއި، ދައްކަން ހުރި ލޯނުތަކަށް ފައިސާ ހޯދޭނެ ގޮތްތައް ފަހިވެފައި ހުރި ކަމަށެވެ.

"މީގެ ކުރިން މިކަންކަމަށް ގްރީން ސިގްނަލް ލިބިފައި ހުރިކަމަށް ވިދާޅުވެ އައިސް، ވައުދުވި ގޮތާ ދިމާ އިދިކޮޅަށް ސިޔާސީ މީހުން ހާހުން އިތުރުކޮށް، ހަރަދުތައް ބޮޑުކޮށް، ސަރުކާރުގެ ފައިނޭންސިން ސްޓްރެޓެޖީ ފެއިލްވެ، މާލީ ކަންތައްތައް މެނޭޖް ނުކުރެވި، އޭގެ ނޭދެވޭ އަސަރު މިހާރު އިގްތިސާދަށް ވެސް ކުރާތަން މިފެންނަނީ،" އޭނާ ވިދާޅުވި އެވެ.

ސަރުކާރުން ހަރަދު ކުޑަކުރަންޖެހޭ ކަމަށާއި ނަމަވެސް ފުރަތަމަ ޖެހެނީ އިތުރުކުރި ހަރަދުތައް ކުޑަކުރަން ކަމަށް އަމީރު ވިދާޅުވި އެވެ، އެގޮތުން އިތުރަށް ނެގި ސިޔާސީ މީހުންނަށް އެކަނިވެސް މަހަކު 50 މިލިއަން ރުފިޔާ ބަޖެޓުން ހަރަދު ކުރާކަމަށާއި އަދި 10 ޕަސެންޓް ކަނޑާލިއަސް 45 މިލިއަން ރުފިޔާ ދައްކާނީ ހަމަ ބަޖެޓުންކަމަށް އޭނާ ވިދާޅުވި އެވެ.