ޔޫޓިއުބް ކޮންޓެންޓް ކްރިއޭޝަން ކުންފުންޏެއް ކަމަށްވާ މިސްޓް ބީސްޓްގެ ވަޒީފާގެ މާހައުލުގައި ޖިންސީ ފުރައްސާރަކުރާ ކަމަށް ބުނެ ފުލުހުންނަށް ހުށައެޅުނު މައްސަލައަކީ މިފަހުން މީޑިއާގައި އެންމެ އަޑުގަދަވި އެއް މައްސަލަ އެވެ.

މީގެ ތިން މަހެއްހާ ދުވަސް ކުރިން ފުލުހުންނަށް ހުށައެޅުނު އެ މައްސަލައާ ގުޅިގެން ކުރެވުނު ދިގު ތަހުގީގު މިހާރު ނިމުމަކަށް ވަނީ އައިސްފަ އެވެ.

އެގޮތުން ކުރެވުނު ތަހުގީގު ތަކުން ވަޒީފާގެ މާހައުލުގައި ޖިންސީ ފުރައްސާރަ ކުރެވެމުން ދިޔަ ކަމުގެ އެއްވެސް ހެއްކެއް ފެނިފައެއް ނުވެ އެވެ.

އެ ކުންފުނީގައި މިވަގުތު ވަޒީފާ އަދާކުރާ ނުވަތަ ވަޒީފާއިން ވަކިވެފައިވާ 39 މީހަކާ ތަހުގީގު މަރުހަލާގައި ވާހަކަ ދެކެވިފައިވާއިރު އެއިން އެއްވެސް މީހެއްގެ ފަރާތުން އެފަދަ މައުލޫމާތެއް ލިބިފައިނުވާ ކަމަށް ފުލުހުންނާ ހަވާލާދީ ނޫސްތަކުން ބުނެ އެވެ.

އެެހެން ނަމަވެސް މިސްޓަ ބީސްޓްގެ މެނޭޖްމަންޓުން ވަނީ އެ މައްސަލައާ ގުޅިގެން އެ ކުންފުނީގެ ބައެއް މުވައްޒަފުން ވަޒީފާއިން ވަކިކޮށްފައިވާ ކަމަށް ބުނެފަ އެވެ.

މިސްޓަ ބީސްޓްއަކީ ދުނިޔޭގެ އެކި ކަންކޮޅުތަކުގެ މީހުންގެ މަގުބޫލުކަން ހޯދާފައިވާ އޮންލައިން ކޮންޓެންޓް އުފައްދާ ކުންފުންޏެކެވެ. އެ ކުންފުނީގެ ޔޫޓިއުބް ޗެނަލްއަށް 326 މިލިއަން މީހުން ސަބްސްކްރައިބް ކޮށްފައިވެ އެވެ.