އުފަން ދަރިން ގިނަވާ ވަރަކަށް އިންސާނެއްގެ ކެތްތެރިކަން ވެސް އިތުރުވާ ކަމަށް ބޮލީވުޑްގެ މަގުބޫލު ތަރި ޝާހްރުކް ޚާން ބުނެފި އެވެ.

ޝާހްރުކް ޚާން މިހެން ބުނެފައިވަނީ އޭނާގެ 59 ވަނަ އުފަން ދުވަހުގެ މުނާސަބަތުގައި ސަޕޯޓަރުންނާ ބައްދަލު ކޮށްލަން ބޭއްވި ކުޑަ އިވެންޓެއްގެ ތެރެއިންނެވެ. އެ އިވެންޓުގައި އޭނާ ވަނީ އާއިލާއާއެކު އޭނާގެ އުފަން ދުވަސް ހޭދަކުރި ގޮތް ސަޕޯޓަރުންނާ ހިއްސާކޮށްފަ އެވެ.

"އަހަރެންގެ އުފަން ދުވަހު އަހަރެން ހޭލީ ލަހުން، ހޭލުމުން އެނގުނީ ހަގު ދަރިފުޅުގެ އައިޕެޑް މަސައްކަތް ނުކުރާކަން. އެކަން ހައްލު ކުރުމުން ދެން އެނގުނީ އަންހެން ދަރިފުޅުގެ ހެދުންތަކުގައި މައްސަލަ އުޅޭކަން" މަޖާ ރާގަކަށް ޝާހްރުކް ޚާން ބުންޏެވެ.

މި ހުރިހާ ކަމަކުން ވެސް އޭނާގެ ކެތްތެރިކަން އިތުރުވާ ކަމަށާއި އެހެން ކަމުން ދަރިން ގިނަވާ ވަރަކަށް އިންސާނުންގެ ކެތްތެރިކަން އިތުރުވާ ކަމަށް ޝާހްރުކް ޚާން ބުންޏެވެ.

ޝާހްރުކް ޚާންގެ ތިން ދަރިން ތިބެ އެވެ. އެއީ ދޮށީ ފިރިހެން ދަރި އާރްޔަން ޚާން އާއި އަންހެން ދަރި ޝުހާނާ ޚާން އަދި އެންމެ ހަގު ދަރި އަބްރަމް ޚާން އެވެ.

ޝާހްރުކް ޚާންގެ 59 ވަނަ އުފަން ދުވަސް އޭނާގެ އަންހެނުން ގައުރީ ހާން ވަނީ ކުލަގަދަކޮށް ފާހަގަކޮށްފަ އެވެ. އެގޮތުން އެމީހުންގެ ގެ މަންނަތުގައި ކޭކު ފަޅާ މަންޒަރު ފެންނަ ފޮޓޯއެއް ގައުރީ ވަނީ އާއްމުކޮށްފަ އެވެ.

ފިލްމީ މަސައްކަތްތަކަށް ބަލާއިރު ޝާހްރުކް ޚާން ވަނީ ދާދި ފަހުން ވިކީ ކައުޝަލްއާއެކު އައިފާ އެވޯޑްސް ހުށައަޅައިދީފަ އެވެ. އޭނާގެ ކުރިއަށް އޮތް މަސައްކަތަކީ "ކިންގް" އެވެ.