ދޮންމަންމާފުޅު، ސްރީލަންކާ ރައްޔިތެއް ކަމުގައިވާ ޖީ ސްކީލާން ޑިޕޯޓްކުރި މައްސަލައާ ގުޅޭގޮތުން އެއްޗެއް ވިދާޅުނުވެ، ދޮންމާމާފުޅުގެ މައްސަލައިގެ ބައެއް މައުލޫމާތު ރައީސް މުހައްމަދު މުއިއްޒު ހިއްސާކުރައްވައިފި އެވެ.

ސަރުކާރުގެ 20 އަހަރުގެ މާސްޓާ ޕްލޭން އިފްތިތާހުކުރުމުގެ ރަސްމިއްޔާތަށްފަހު ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވި ގޮތުގައި، ލަންކާގައިހުރި ތިން ގޯއްޗާއި އިމާރާތްތަކާއި ވިޔަފާރި، އަދި ބައްޕާފުޅުގެ ސްރީލަންކާ އެކައުންޓުގައި ހުރި ހުރިހާ ފައިސާއެއް އެމަނިކުފާނު ދޮންމަންމާފުޅަށް ދެއްވާފައިވާނެ ކަމަށެވެ.

"އަޅުގަނޑު ނިންމީ އެ ތިން ގޯތި އިމާރާތާ އެކު ވިޔަފާރިއާ އެކު ދޮންމަންމައަށް ދޭން ހިލޭ އެއްވެސް ބަދަލަކާ ނުލައި،" ރައީސް ވިދާޅުވި އެވެ. އޭގެއިތުރުން، ހުވަފަތް އަނބީންގެ ގޮތުން ދޮންމަންމާފުޅަށް ލިބޭ ބައިކުޅަ ބައި ދޮންމަންމާފުޅު ވަނީ ރައީސް މުއިއްޒަށް ދޫކޮށްލައްވާފައިކަމަށްވެސް ވިދާޅުވި އެވެ.

ދޮންމަންމާފުޅާ ގުޅުވައިގެން އެމަނިކުފާނާ ދެކޮޅަށް ކުރެވިފައިވާ އެންމެހައި ތުހުމަތުތަކަކީ ދޮގު ވާހަކަތަކެއްކަމަށް ރައީސް މުއިއްޒު ވަނީ ވިދާޅުވެފަ އެވެ.

މި މައްސަލަ އަލުން ފެންމަތިވެފައި މިވަނީ ރައީސް މުހައްމަދު މުއިއްޒުގެ ދޮންމަންމާފުޅާމެދު އަމަލު ކުރިގޮތުގެ މައްޗަށް އޮންލައިން ނޫސް "އަދަދު" އިން ހެދި "ސްކީލާން" ޑޮކިއުމަންޓްރީއަށް މިއަހަރުގެ ނޫސްވެރިކަމުގެ އިނާމު ލިބުމާއި ގުޅިގެންނެވެ.

ނޫސްވެރިކަމުގެ ތަހުގީގީ ދާއިރާއިން އަދަދުގެ ޑޮކިއުމެންޓްރީއަށް އެވޯޑް ލިބިފައިވާއިރު، އެ ޑޮކިއުމެންޓްރީއަށް ރައީސްގެ ދޮންމާމާފުޅު ދެއްވި އިންޓަވިއުގައި ވިދާޅުވެފައިވަނީ ފިރިކަލުން (ރައީސް މުއިއްޒުގެ ބައްޕާފުޅު) ހުސައިން އަބްދުއްރަހްމާން 2015 ވަނަ އަހަރު އަވަހާރަވުމުން ސްކީލާން ސްރީ ލަންކާއަށް ދުވަސްކޮޅަކަށް ދިޔަ ކަމަށެވެ. ނަމަވެސް އޭނާ އެނބުރި މާލެ އައިއިރު، އެއްވެސް ހެއްކެއް ނެތް ތުހުމަތުތަކެއްކޮށް، އޭނާ ރާއްޖެ އެތެރެވުން މަނާކޮށް، ވިސާ އޮތީ ކެންސަލް ކޮށްފައި ކަމަށް އޭނާ ބުނެފައިވެ އެވެ.