މިނިވަން މުއައްސަސާތަކުގެ ބައެއް މެމްބަރުންގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހުގެ މިނިވަންމުއައްސަސާތަކާ ބެހޭ ކޮމިޓީއަށް ހުށަހަޅައިފި އެވެ.

އެ މައްސަލަ އެ ކޮމިޓީއަށް ހުށަހަޅާފައި ވަނީ ސަރުކާރު ހިންގާ ޕީއެންސީގެ މެމްބަރެކެވެ. ނަމަވެސް އެ މައްސަލަ ހުށަހެޅި މެމްބަރުގެ ނަން ވަނީ ސިއްރުކޮށްފަ އެވެ.

އެގޮތުން އިތުބާރުނެތްކަމަށް ހުށަހަޅާފައި ވަނީ ސިވިލްސާވިސް ކޮމިޝަނުގެ ރައީސް މުހައްމަދު ނާސިހާއި އިލެކްޝަންސް ކޮމިޝަނުގެ މެމްބަރުން ކަމަށްވާ އަލީ ނަޝާތާއި މުހައްމަދު އާސިފްގެ އިތުރުން އެންޓި ކޮރަޕްޝަން ކޮމިޝަނުގެ މެމްބަރު ތޯހާ މުހައްމަދުގެ އެވެ.

އެ ބޭފުޅުންގެ އިތުބާރުނެތް ކަމަށް ހުށަހެޅި ސަބަބު ވެސް އަދި ވަނީ ސިއްރުކޮށްފަ އެވެ. އެންޓި ކޮރަޕްޝަން ކޮމިޝަނާއި އިލެކްޝަންސް ކޮމިޝަނުގެ ރައީސާއި ނައިބު ރައީސް އައްޔަންކުރުމުގެ ބާރު ރައީސް ޑރ. މުހައްމަދު މުއިއްޒަށް ދިނުމަށް ގާނޫނަށް މިހާރު ވަނީ އިސްލާހު ހުށަހަޅާފަ އެވެ.

އިދިކޮޅު އެމްޑީޕީން ބުނީ އެއީ އެ ދެ ކޮމިޝަނަށް ސީދާ ރައީސް މުއިއްޒުގެ ނުފޫޒު ފޯރުވައި އެމަނިކުފާނު ބޭނުންވާ ގޮތަށް ކަންކަން ނިންމުމަށް މަގުފަހިކުރުމަށް ގެންނަ ބަދަލެއް ކަމަށެވެ.

އިތުބާރުނެތް ކަމުގެ މައްސަލަ ހުށަހެޅި އެންމެންނަކީ ވެސް މިދިޔަ ސަރުކާރު އޮތްއިރު އެ މަގާމްތަކަށް އައްޔަންކުރެއްވި ބޭފުޅުންނެވެ.

ސިވިލްސާވިސް ކޮމިޝަންގެ މެމްބަރު ކަމަށް ނާސިހު އައްޔަނުކުރީ ސެޕްޓެމްބަރު 3، 2020 ގަ އެވެ. އިލެކްޝަންސް ކޮމިޝަނުގެ މެމްބަރު ކަމަށް ނަޝާތު ދެ ވަނަ ދައުރަކަށް އައްޔަނުކުރީ މިދިޔަ އަހަރުގެ ނޮވެމްބަރު 16، ގަ އެވެ. އެ ކޮމިޝަނުގެ މެމްބަރު ކަމަށް އާސިފް އައްޔަނުކުރީ ސެޕްޓެމްބަރު 6، 2021 ގަ އެވެ. އަދި އެންޓި ކޮރަޕްޝަން ކޮމިޝަނަށް ތޯހާ އައްޔަނުކުރީ މާޗު 17، 2022 ގަ އެވެ.