ބޮލީވުޑްގެ ޒުވާން ތަރި އާތިޔާ ޝެޓީއާއި އޭނާގެ ފިރިމީހާ ކްރިކެޓް ކުޅުންތެރިޔާ ކޭއެލް ރާހުލްއަށް އަލަތު ދަރިފުޅު ލިބެން އުޅޭކަން އިއުލާން ކޮށްފި އެވެ.

މިދިޔަ ހުކުރު ދުވަހު އާތިޔާއާއި ރާހުލްގެ އިންސްޓަގްރާމް މެދުވެރިކޮށް ކުރި އެ އިއުލާނުގައި ބުނެފައިވަނީ އެމީހުންގެ ދިރިއުޅުމަށް އަންނަ އެންމެ ބޮޑު އުފާވެރިކަން އަންނަން ގާތްވެއްޖެ ކަމަށެވެ.

އެއާއެކު އާތިޔާ ބަލިވެ އިންކަން ޔަގީންވިއިރު އޭނާއަށް ދުވަސް ފުރޭނީ އަންނަ އަހަރުގެ ތެރޭގައި ކަމަށް ވެސް އެ ޕޯސްޓުގައި ބުނެފައިވެ އެވެ.

https://www.instagram.com/p/DCG_46vykAj/?utm_source=ig_embed&ig_rid=97d486d3-d39b-4905-9355-f66981c5a0d4

މިއަހަރުގެ އޭޕްރީލް މަހުގެ ތެރޭގައި ވެސް އާތިޔާ ބަލިވެ އިންކަމަށް އަޑު ފެތުރުނެވެ. އެހެން ނަމަވެސް އެ އަޑުތައް އެ ދެމަފިރިން ޔަގީން ކޮށްދީފައެއް ނުވެ އެވެ.

2019 ވަނަ އަހަރު ބައްދަލުވި އާތިޔާއާއި ރާހުލް ލޯބީގެ ގޮތުން ގުޅިގެން އުޅުމަށްފަހު ކައިވެނިކުރީ 2023 ވަނަ އަހަރު ކަންޑާލާގައި ހުންނަ އާތިޔާގެ ބައްޕަ ސުނިލް ޝެޓީގެ ފާމްހައުސްގަ އެވެ.

އާތިޔާއާއި ރާހުލްއަށް އަލަތު ދަރިއަކު ލިބެން އުޅޭކަން އިއުލާން ކުރުމާއެކު އާއްމުންގެ އިތުރުން ބޮލީވުޑްގެ ތަރިން ވެސް އަންނަނީ އެ ދެމީހުންނަށް މަރުހަބާ ކިޔަމުންނެވެ.