ދޯންޏެއްގެ ބުރަފަތީގައި ޖެހި އިއްޔެގެ ވަގުތެއްގައި މަރުވީ ސްކޫލް ދަތުރެއްގައި ރާއްޖެއައިސް އުޅުނު ސިންގަޕޫރުގެ ސެއިންޓް ޖޯސެފްސް އިންސްޓިޓިއުޝަން (އެސްޖޭއައި) އިންޓަނޭޝަނަލްގެ ގްރޭޑް ނުވައެއްގައި ކިޔަވަމުންދިޔަ ދަރިވަރެއް ކަމަށް އެ ގައުމުގެ ނޫހަކުން ބުނެފި އެވެ.

ސިންގަޕޫރުގެ ސްޓްރެއިޓްސް ޓައިމްސް ނޫހުން އެ ސްކޫލުގެ ޗީފް އެގްޒެކެޓިވް ޑރ. މައިކަލް ޖޮންސްޓަން އާއި ހަވާލާދީ ބުނި ގޮތުގައި ގްރޭޑް 9 ގެ ދަރިވަރު، އުމުރުން 15 އަހަރުގެ ޖެންނާ ޗަން، ރާއްޖެ އައިސް އުޅުނީ އެ ސުކޫލުގެ ފަރާތުން ނެޝަނަލް ޔޫތު އެޗީވްމަންޓް އެވޯޑްގެ ދަތުރެއްގަ އެވެ.

ޑރ. ޖޮންސްޓަން ވިދާޅުވީ މި ހިތާމަވެރި ހާދިސާއާއި ގުޅިގެން ޖެންނާގެ އާއިލާއާއި ހައި ސްކޫލުގެ ޕްރިންސިޕަލް އާއެކު ސުކޫލުގެ ޓީމެއް މާލެއަށް އައިސްފައިވާ ކަމަށެވެ. މި ޓީމުން އާއިލާއަށާއި ދަރިވަރުންނަށާއި މުވައްޒަފުންނަށް ބޭނުންވާ އެހީތެރިކަން ފޯރުކޮށްދޭނެ ކަމަށް އޭނާ ބުންޏެވެ.

ސްކޫލުން ވަނީ ދަރިވަރުންނަށް ހިތާމައިގެ އެހީތެރިކަމާއި ކައުންސެލިންގް ޚިދުމަތްތައް ކެމްޕަހުގައި ފަށާފައި ކަމަށް ވެސް އޭނާ ވިދާޅުވި އެވެ.

"ދިވެހި އިދާރާތަކުން މިހާރު ތަހުގީގު ކުރަމުންދާތީ، މި ވަގުތު އިތުރު މައުލޫމާތެއް ދެވެން ނެތް. އަޅުގަނޑުމެންގެ އިސްކަމަކަށް ވާނީ މި އުނދަގޫ ވަގުތުގައި ޖެންނާގެ އާއިލާއަށާއި އަޅުގަނޑުމެންގެ ދަރިވަރުންނަށާއި މުވައްޒަފުންނަށް އެހީތެރިވުން،" ޖޮސްޓަން ވިދާޅުވި އެވެ.

އެސްޖޭއައި އިންޓަރނޭޝަނަލްގެ ވެބްސައިޓުގައިވާ ގޮތުން، ދަރިވަރުން އައުޓްޑޯ ތައުލީމުގެ ބައެއްގެ ގޮތުން، ގްރޭޑް އެކްސްޕެޑިޝަންތަކުގައި ބައިވެރިވެ އެވެ. އެ ގޮތުން ޖެންނާ ވެސް ރާއްޖެ އައިސްފައި ވަނީ އެފަދަ ދަތުރެއްގަ އެވެ.

ދިވެހި ފުލުހުން އިއްޔެ މީޑިއާތަކަށް މައުލޫމާތު ދެމުން ބުނެފައިވަނީ ވޭލް ޝާކް ރިސާޗެއް ހަދަން ސްޓަޑީ ޓުއާއެއްގައި އދ. ދިގުރަށަށް ގޮސް އުޅުނު ޓީމެއްގައި ހިމެނޭ ސިންގަޕޫރަށް ނިސްބަތްވާ 15 އަހަރުގެ އަންހެން ކުއްޖަކު، ސްނޯކްލިން އަށް މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ލިބުނު ޒަހަމްތަކާއި ގުޅިގެން އެ ކުއްޖާ ނިޔާވެފައިވާ ކަމަށެވެ.

ފުލުހުން އަންނަނީ މި މައްސަލަ ތަހުގީގު ކުރަމުންނެވެ.