ކްރިކެޓް ކުޅުންތެރިޔާ ހާރްދިކް ޕާންޑްޔާއާއި މޮޑެލް ނާތާޝާ ސްޓެންކޮވިކްގެ ކައިވެނި ރޫޅުނުކަން އެ ދެމީހުން އިއުލާންކުރީ މިދިޔަ ޖުލައި މަހު އެވެ.

މީގެ ހަތަރު އަހަރު ކުރިން، 2020 ވަނަ އަހަރު ކައިވެނިކުރި ހާރްދިކް އާއި ނަތާޝާއަށް ދަރިއަކު ލިބިފައިވާއިރު އެ ދެމީހުން ވަކިން ދިރިއުޅެމުން އަންނަތާ ގިނަ ދުވަސްތަކެއް ވެއްޖެ އެވެ.

ކައިވެނި ރޫޅުމަށްފަހު ނާތާޝާ އޭނާގެ ދަރިފުޅު ގޮވައިގެން އޭނާގެ އުފަން ގައުމު ސާބިއާއަށް ބަދަލުވާން އުޅޭކަމުގެ އަޑުތަކެއް ވެސް ފެތުރުނެވެ.

ދާދި ފަހުން ދިން އިންޓަވިއުއެއްގައި ނަތާޝާ ވަނީ މިހާރު ދައުރު ވަމުން އަންނަ އެ އަޑުތަކުގެ ހަގީގަތް މީޑިއާއަށް ހިއްސާކޮށްފަ އެވެ.

"އަހަރެން އެނބުރި ދާން އުޅޭ ކަމަށް ބުނެ އަޑުތައް ފެތުރޭ. އެކަމަކު އެކަން ވާނީ ކިހިނެއް؟ މިތަނުގެ ސްކޫލަކަށް ދާ އަހަރެންގެ ދަރިއަކު އެބަހުރި،" ނަތާޝާ ބުންޏެވެ.

ނަތާޝާ އިތުރަށް ބުނީ އޭނާގެ ދަރިފުޅު އަގަސްތުޔާ ކޮންމެ ގޮތެއް ވިޔަސް ނިސްބަތްވާނީ އިންޑިއާއަށް ކަމަށާއި އެ ދަރިފުޅުގެ ސަބަބުން އޭނާއާއި ހާރްދިކްއަކީ އަދިވެސް އާއިލާއެއް ކަމަށެވެ.

ސާބިއާއަށް ދިރިއުޅުން އެއްކޮށް ބަދަލު ނުކުރާނެ ކަމަށް ނަތާޝާ ބުނި ނަމަވެސް ކޮންމެ އަހަރަކުވެސް އެގައުމަށް ޗުއްޓީއަށް ދާ ކަމަށް އޭނާ ބުންޏެވެ.