ބޮލީވުޑްގެ މި ޖީލުގައި ފިރިހެނުންނަށް ކިޔާވަރުގެ ތަރިން ނޫޅޭ ކަމަށާއި ފެންނަނީ މުޅިން ވެސް "ޅަ ކުދިން" ކަމަށް މަޝްހޫރު ތަރި އަޖޭ ދޭވްގަން ބުނެފި އެވެ.

"ރަންވީރު ޝޯ"އަށް ދިން އިންޓަވިއުއެއްގައި އަޖޭ ބުނީ ފިރިހެނަކަށް ވަނީ ވަރުގަދަ ހަށިގަނޑެއް ހުރުމުން ނޫން ކަމަށާއި އެހެން ނަމަވެސް އެއީ މީހާގެ އުޅުމާއި މިޒާޖުގެ ގޮތުން ވާ ކަމެއް ކަމަށެވެ.

މިހާރު ބޮލީވުޑްގައި ފެންނަ ތަރިންނަށް ވަރުގަދަ ހަށިގަނޑެއް ލިބިފައިވީ ނަމަވެސް އަސްލު ފިރިހެނުންނަށް ނުވާ ކަމަށް އޭނާ ބުންޏެވެ.

"އަހަރުމެންގެ ޒަމާނުގައި އުޅުނު އެކްޓަރުންގެ ފިލްމުތަކަށް އެހާ ބޮޑު ތަރުހީބެއް ލިބުނީ އެ ފިލްމުތަކުގައި ދައްކުވައިދޭ މަންޒަރުތަކަކީ އެ އެކްޓަރުންނަށް ހަގީގަތުގައި ވެސް ކުރެވިދާނެ ކަންކަން ކަން ގަބޫލު ކުރެވޭތީ. އެކަމަކު މިހާރުގެ އެކްޓަރުން އެހެނެއް ނޫން،" އަޖޭ ބުންޏެވެ.

އެގޮތުން އަމީތާބް ބައްޗަންއާއި ޖެކީ ޝްރޮފް، އަކްޝޭ ކުމާރު އަދި ސަނީ ޑިއޯލްގެ ނަން އަޖޭގެ އިންޓަވިއުގައި އޭނާ ފާހަގަކުރި އެވެ.

އަޖޭ އިތުރަށް ބުނީ އޭނާ އިޝާރާތް އެ ކުރަނީ ވަކި އެކްޓަރަކަށް ނޫން ކަމަށާއި ބޮލީވުޑްގެ މި ޖީލުގެ ފިރިހެން އެކްޓަރުންނަށް ކަރަށެވެ.

އަޖޭގެ ފިލްމީ މަސައްކަތްތަކަށް ބަލާއިރު އޭނާގެ އެންމެ ފަހުގެ މަސައްކަތަކީ ރޯހިތު ޝެޓީ ޑައިރެކްޓްކުރި ފިލްމް "ސިންގަމް އަގެއިން" އެވެ.