ގިނަ ބަޔަކު އިންތިޒާރު ކުރަމުން އަންނަ ހޮލީވުޑްގެ މަޝްހޫރު ފިލްމް ފްރެންޗައިޒް "މިޝަން އިމްޕޮސިބަލް"ގެ 8 ވަނަ ފިލްމުގެ ޓީޒާ އާއްމުކޮށް ދައްކާލައިފި އެވެ.

މިހާރު އިންޓަނެޓުގައި ދައުރުވަމުން އަންނަ އެ ޓީޒާގައި ފެންނަނީ ފލްމުގެ ލީޑު ކެރެކްޓަރު އީތަން ހަންޓް (ޓޮމް ކްރޫޒް)ގެ އެކްޝަން މަންޒަރުތަކެކެވެ. އެ ޓީޒާގައި 1996 ވަނަ އަހަރު ނުކުތް އެ ފްރެންޗައިޒުގެ އެންމެ ފުރަތަމަ ފިލްމުގެ ބައެއް ކަންކަން ހިމަނާފައިވާކަން ފާހަގަ ކޮށްލެވެ އެވެ.

އެއާއެކު މި ފިލްމަކީ މިޝަން އިމްޕޮސިބަލްގެ އެންމެ ފަހު ފިލްމަށް ވެދާނެ ކަމުގެ އިޝާރާތެއް ވެސް ޓީޒާގެ ތެރެއިން ދީފައިވެ އެވެ.

އެގޮތުން އީތަން ހަންޓްގެ ގޮތުގައި ޓޮމް ވަނީ "އެންމެ ފަހު ފަހަރަށް އޭނާއަށް އިތުބާރު ކުރުމަށް" ޓީޒާގެ ތެރެއިން ބުނެފަ އެވެ. މިކަމުން ދޭހަވަނީ ދެން އެ ފްރެންޗައިޒްގެ ފިލްމެއް ނުފެންނާނެ ކަން ކަމަށް ހަބަރުތައް ބުނެ އެވެ.

މި ޓީޒާ އިންޓަނެޓަށް ދޫކޮށްލުމާއެކު ގިނަ ބައެއްގެ ތައުރީފު ލިބެމުން އައި ނަމަވެސް މިޝަން އިމްޕޮސިބަލް ނިމުމަކަށް އަންނާތީ ހިތާމަ ފާޅުކުރާ މީހުން ވެސް އުޅެ އެވެ.

ޓޮމް ކްރޫޒްގެ އިތުރުން ހޭލީ އަޓްވެލްއާއި ޕޮމް ކްލެމެންޓިއެފް މުހިއްމު ރޯލުތަކުން ފެނިގެންދާ މިޝަން އިމްޕޮސިބަލް 8 ސިނަމާތަކަށް އަންނާނީ އަންނަ އަހަރުގެ މެއި މަހުގެ ތެރޭގަ އެވެ.