ސިޔާސީ ޕާޓީގެ ގާނޫނާ ހިލާފުވެއްޖެނަމަ، އެ އަމަލެއް ހިންގި ޕާޓީއެއް 100،000 ރުފިޔާއިން ޖޫރިމަނާކުރެވޭ ގޮތަށް ހުށަހަޅާފައި އޮތް އިސްލާހު މިއަދު ރައީސުލްޖުމްހޫރިއްޔާ މުހައްމަދު މުއިއްޒު ތަސްދީގުކުރައްވައިފި އެވެ.

ސިޔާސީ ޕާޓީތަކުގެ ގާނޫނުގެ 49 ވަނަ މާއްދާއަށް އިސްލާހު ހުށަހަޅާފައިވަނީ ދިއްދޫ ދާއިރާގެ ޕީއެންސީ މެންބަރު އަބްދުއްލަތީފް މުހައްމަދެވެ. މިއީ ސިޔާސީ ޕާޓީގެ ގާނޫނަށް ގެނައި ހަތަރު ވަނަ އިސްލާހެވެ. ރައްޔިތުންގެ މަޖިލީހުން މި ބިލު ފާސްކޮށްފައި ވަނީ މިމަހުގެ 13 ވަނަ ދުވަހެވެ.

މި ބިލު ތަސްދީގުކުރެއްވުމުން ސިޔާސީ ޕާޓީތަކުގެ ގާނޫނާ ޚިލާފުވާ މީހަކު 30،000 ރުފިޔާއާއި 75،000 ރުފިޔާއާ ދެމެދުގެ އަދަދަކަށް ޖޫރިމަނާ ކުރެވޭނެ އެވެ. އެ އަމަލެއް ހިންގި ފަރާތް ނިސްބަތްވާ ޕާޓީއެއް 100،000 ރުފިޔާއިން ޖޫރިމަނާ ކުރެވޭނެ ކަމަށް ވެސް އިސްލާހުގައި ބަޔާންކޮށްފައިވެ އެވެ.

މީގެ އިތުރުން ސިޔާސީ ޕާޓީއެއް ގާނޫނާ އެއްގޮތަށް އުވާލާނަމަ، އެ ޕާޓީގެ ނިޝާނާއި، ލޯގޯ ނުވަތަ ޕާޓީ ރަމްޒުކޮށްދޭ އެއްޗެއް، އެހެން ޕާޓީއަކުން ބޭނުންކުރެވޭނީ ޕާޓީ އުވާލާ ތާރީޚުން ފެށިގެން ފަސް އަހަރު ފަހުންކަމަށް އެ ބިލުގައި ކަނޑައަޅާފައިވެ އެވެ.

ކޮންމެ ފަސް އަހަރަކުން އެއް ފަހަރު ޕާޓީގެ ގައުމީ ބައްދަލުވުމެއް ނުބާއްވާނަމަ އިލެކްޝަންސް ކޮމިޝަން (އީސީ) އިން އެ ޕާޓީއެއް އުވާލާނެ ކަމަށް ބުނާ މާއްދާވެސް ވަނީ އުވާލާފަ އެވެ. މީގެ އިތުރުން ސިޔާސީ ޕާޓީތަކުގެ ޕްރައިމަރީއާ ބެހޭ މާއްދާވެސް ވަނީ އުވާލާފަ އެވެ.