އެމްއެމްއޭއިން ނެރެފައިވާ ބޭރުފައިސާ މާރުކުރުމުގެ ގަވާއިދު ބަދަލުނުކުރާނެ ކަމަށް ވިދާޅުވެ ރައީސް ޑރ. މުހައްމަދު މުއިއްޒު ވިޔަފާރިވެރިންނަށް ގޮންޖައްސަވައިފި އެވެ.

ސަރުކާރަށް އެއް އަހަރު ފުރުން ފާހަގަކުރަން މިހާރު ބާއްވަމުންދާ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އެމްއެމްއޭގެ ގަވާއިދުގެ ދަށުން ރިސޯޓްތަކަށް ނަގަނީ ޓޫރިޒަމްގެ އާމްދަނީގެ 20 ޕަސެންޓް ކަމަށެވެ.

އެ ގަވާއިދު ތަންފީޒުކުރަން ފެށުމުން ސަރުކާރު ހިއްސާވާ ކުންފުނިތަކުން ޑޮލަރު ހޯދަން އުފުލަމުން އައި ތަކުލީފުތައް ނިމުމަކަށް އައިސް ރަސްމީ ރޭޓްގައި ފަސޭހައިން ޑޮލަރު ލިބޭނެ ކަމަށެވެ. އަދި އަންނަ އަހަރުގެ ޖުލައި މަހުން ފެށިގެން ރަސްމީ ރޭޓްގައި ރައްޔިތުންނަށް ޑޮލަރު ލިބޭނެ ކަމަށް ވެސް އެމަނިކުފާނު ވިދާޅުވި އެވެ.

"އަޅުގަނޑުމެން ނެތިން މި ގަވާއިދު ބަދަލުކުރާކަށް. ވަރަށް ސާފުކޮށް މި ދެންނެވީ ގަވާއިދު ބަދަލެއް ނުކުރާނަމޭ. ވަރަށް ސާފުކޮށް މި ދެންނެވީ ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވަންވާނެއޭ. ގަވާއިދަށް ތަބާވުމަކީ އެންމެންގެ މައްޗަށް ލާޒިމް ކަމެކޭ. މިކަން ކުރައްވަން ޖެހިވަޑައިގަންނަވާނެއޭ. މިއީ ގާނޫނު އަސާސީއާ އެއްގޮތަށް ކުރާކަމެއް. ގާނޫނުތަކާ އެއްގޮތަށް ކުރާކަމެއް،" ރައީސް ވިދާޅުވި އެވެ.

ރައީސް ވިދާޅުވީ އެ ގަވާއިދު ތަންފީޒުކުރުން އެމްއެމްއޭއަށް ފަސޭހަކޮށްދިނުމަށް ގާނޫނެއް ވެސް ރައްޔިތުންގެ މަޖިލީހުން ފާސްކޮށްދޭނެ ކަމަށެވެ.

ކޮންމެ ރިސޯޓަކަށް އަންނަ ޓޫރިސްޓެއްގެ ބޮލަކަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށް ފާހަގަކޮށް ރާއްޖޭގެ އެންމެ ބޮޑެތި ވިޔަފާރިވެރިންގެ ތެރޭގައި ހިމެނޭ ޗާމްޕާ މުހައްމަދު މޫސާ އާއި ޔުނިވާސަލްގެ ޗެއާމަން މުހައްމަދު އުމަރު މަނިކު ވަނީ އެމްއެމްއޭގައި ސިޓީއަކުން އެކަން ދަންނަވާފަ އެވެ. އަދި ރައީސް މުއިއްޒުގެ ޓޫރިޒަމް އެޑްވައިޒަރު މުހައްމަދު ޚަލީލާއި އިތުރު ވިޔަފާރިވެރިންތަކެއް ވަނީ އެމްއެމްއޭގައި އެފަދައިން އެދިފަ އެވެ.

ޗަމްޕާ މުހައްމަދު މޫސާ ވިދާޅުވީ އެމްއެމްއޭއިން ނެރުނު އެ ގަވާއިދުގެ ސަބަބުން ރިސޯޓްތަކަށް ލިބޭ އާމްދަނީއަށް ވުރެ އިތުރަށް ހަރަދުކުރަން ޖެހޭ ކަމަށެވެ. ނަތީޖާއެއްގެގޮތުން ރިސޯޓްތަކަށް މާލީގޮތުން ގެއްލުމަކާ ކުރިމަތިލާންޖެހިދާނެ ކަމަށް އުއްޗު ވިދާޅުވި އެވެ.

"އެކި ފަންތީގެ ރިސޯޓްތަކުގެ އެވްރެޖް ޑެއިލީ ރޭޓް ތަފާތު ނަމަވެސް އެމްއެމްއޭގެ އާ ގަވައިދުގައި އެކަމަށް ބެލުމެއް ނެތި ހުރިހާ ރިސޯޓްތަކުން އެއްވަރަކަށް ބޭރު ފައިސާ މާރުކުރަން ވަނީ މަޖުބޫރުކޮށްފައި. އަދި މިއީ ރިސޯޓް ވިޔަފާރި ހިނގާ އުސޫލުތަކާ ދިމާނުވާ ގަވާއިދެއް. މިކަމުގެ ސަބަބުން ހާއްސަކޮށް ދަށް ފަންތީގެ ރިސޯޓްތަކަށް އުފުލަން ޖެހޭ މާލީ ގެއްލުން ބޮޑުވާނެ،" މުހައްމަދު މޫސާގެ ސިޓީގައިވެ އެވެ.

ބޭރުގެ އިންވެސްޓަރުންނާ ގުޅިގެން ރާއްޖޭގައި ގިނަ ރިސޯޓުތަކެއް ހިންގާ ކްރައުން އެންޑް ޗަމްޕާ ރިސޯޓްސްގެ އެއް ހިއްސާދާރު ވިދާޅުވީ ސަރުކާރުގެ އެ ނިންމުމަށް އަމަލުކުރަން ޖެހޭނަމަ ހަރަދު ކުޑަކުރުމުގެ ފިޔަވަޅުތައް އަޅަން ވިޔަފާރިވެރިންނަށް މަޖުބޫރުވާނެ ކަމަށެވެ. އެގޮތުން މުވައްޒަފުންގެ މުސާރަތައް ކުޑަކުރަން ޖެހިދާނެ ކަމަށާއި އެމަކުގެ އަސަރު މުޅި އިގްތިސާދަށް ކުރާނެ ކަމަށް އޭނާ ވިދާޅުވި އެވެ.

މީގެ އިތުރުން ދިގު މުއްދަތެއްގައި ފަތުރުވެރިކަމުގެ ސިނާއަތުގައި އިންވެސްޓްކޮށްގެން ތިބި ފަރާތްތަކަށް ލިބޭ ފައިދާ ދަށްވެ، އިންވެސްޓަރުންގެ އިތުބާރު ރާއްޖޭގެ ފަތުރުވެރިކަމުގެ ދާއިރާއަށް ގެއްލުމަކީ ވެސް އެ ގަވާއިދަށް އަމަލުކުރުމުގެ ނޭދެވޭ ނަތީޖާއެއް ކަމަށް ވެސް އުއްޗުގެ ސިޓީގައި ފާހަގަކޮށްފައިވެ އެވެ.