މޯލްޑިވްމް މަނިޓަރީ އޮތޯރިޓީ ( އެމްއެމްއޭ) އިން ބޭރު ފައިސާއާ ބެހޭ ގަވައިދަށް ގެނައި ބަދަލުގެ ސަބަބުން އަންނަ އަހަރު ދައުލަތުގެ ރިޒާވް ރަނގަޅުވާނެ ކަމަށް ފިނެންސް މިނިސްޓްރީއިން ލަފާކޮށްފި އެވެ. އެ ގޮތުން ޑޮލަރު މާރުކޮށްފިނަމަ، ދައުލަތުގެ ރިޒާމް 705 މިލިއަން ޑޮލަރަށް އިތުރުވާނެ ކަމަށް އަންނަ އަހަރުގެ ދައުލަތުގެ ބަޖެޓުގައި ލަފާކޮށްފައިވެ އެވެ.

މިދިޔަ މަހުގެ އެއް ވަނަ ދުވަހުން ފެށިގެން އަމަލުކުރަން ފެށި ބޭރު ފައިސާއާ ބެހޭ ގަވައިދުގައިވާ ގޮތުން ރިސޯޓުތަކުން އަންނަ ކޮންމެ ޓޫރިސްޓަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކޮށް މާރުކުރަން މަޖުބޫރުވާނެ އެވެ. އަދި ގެސްޓް ހައުސްތަކުން ކޮންމެ ޓޫރިސްޓަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

ބޭރު ފައިސާގެ ރިޒާވް އިތުރުކުރުމަށް މިއަހަރު ވަނީ ރިޒާވް ބޭންކް އޮފް އިންޑިއާ މެދުވެރިކޮށް އެމްއެމްއޭ އިން 400 މިލިއަން ޑޮލަރުގެ ކަރެންސީ ސްވޮޕެއް ހަދާފަ އެވެ. އެއާއެކު މިދިޔަ މަސް ނިމުނު އިރު ރަސްމީ ރިޒާވް ހުރީ 615 މިލިއަން ޑޮލަރުގަ އެވެ.

މިދިޔަ އަހަރު ނިމުނު އިރު ރަސްމީ ރިޒާވްގައި ހުރީ 590 މިލިއަން ޑޮލަރެވެ. އަދި މިއަހަރު ނިމޭއިރު ރިޒާވް ހުންނާނެ ކަމަށް ބެލެވެނީ 654 މިލިއަން ޑޮލަރެވެ.

ފިނޭންސް މިނިސްޓްރީ އިން ރިޒޯޓްތަކުން ޑޮލަރު ލިބޭނެ ކަމަށް ލަފާކޮށްފައިވީ ނަމަވެސް އާންމުކޮށްފައިވާ ގަވައިދާ އެއްގޮތަށް ޑޮލަރު މާރުކުރަން ރިޒޯޓްތަކުން ވަނީ ދެކޮޅު ހަދާފަ އެވެ. އަދި އެ ގަވައިދު މިހާރުން މިހާރަށް ބަދަލުކުރުމަށް ސަރުކާރަށް ސިޓީ ވެސް ވަނީ ފޮނުވާފަ އެވެ.

ނަަމަވެސް ގަވައިދު ބަދަލުނުކުރައްވާނެ ކަމަށް ރައީސް މުހައްމަދު މުއިއްޒު ވަނީ ސަރުކާރަށް އަހަރު ފުރުމުގެ މުނާސަބަތުގައި ބޭއްވި ޖަލްސާގައި ވިދާޅުވެފަ އެވެ.