އެ މެމްބަރަކު އިންތިހާބުވި ޕާޓީ ބަދަލުކޮށްފިނަމަ ގޮނޑި ގެއްލޭނެ ކަމަށް ގާނޫނުއަސާސީގައި ހިމެނުމަށް މާދަމާ ގާނޫނުއަސާސީއަށް އިސްލާހު ހުށަހަޅަން ސަރުކާރުން ނިންމައިފި އެވެ.

މިއަދު ކުއްލިގޮތަށް ބައެއް ވަޒީރުންނާއި މަޖިލިސް މެމްބަރުންނާއެކު ރައީސް ޑރ. މުހައްމަދު މުއިއްޒު ބޭއްވި ބައްދަލުވުމުގައި އެކަން ވަނީ އަންގާފަ އެވެ.

ޕީއެންސީގެ މަޖިލިސް މެމްބަރަކު ވިދާޅުވީ ގާނޫނުއަސާސީއަށް ހުށަހަޅާ އެ އިސްލާހު މިރޭ މަޖިލީހަށް ފޮނުވައި މާދަމާ ބާއްވާ ޖަލްސާއަށް އެޖެންޑާކުރަން ނިންމިކަން އަންގާފައިވާ ކަމަށެވެ.

އެ ބިލް ކުރިއަށްގެންދަން ނިންމާފައި ވަނީ އާންމު އުސޫލާ ހިލާފަށް މާދަމާއިން މާދަމާއަށް މަޖިލީހުގެ ޖަލްސާއިން ބިލް ފާސްކުރާގޮތަށް ކަމަށް އެ މެމްބަރު ވިދާޅުވި އެވެ.

"މިއަދުގެ ބައްދަލުވުމުގައި ބައެއް މެމްބަރުން ވަނީ ފާޅުގައި އެ އިސްލާހާ ދެކޮޅުކަން ހާމަކުރައްވާފައި،" ޕީއެންސީގެ މެމްބަރަކު ވިދާޅުވި އެވެ.

މިފަދަ އިސްލާހެއް ގާނޫނުއަސާސީއަށް ގެންނަނީ މެމްބަރުން ޕާޓީ ބަދަލުކޮށްފިނަމަ ގޮނޑި ގެއްލޭގޮތަށް އެންޓިޑިފެކްޝަން ގާނޫނުގައި ކަނޑައަޅާފައިވާ މާއްދާ ބާތިލްކުރަން ހައިކޯޓަށް މައްސަލައެއް ހުށަހަޅާފައި ވަނިކޮށެވެ. އަދި ޕީއެންސީގެ ބައެއް މެމްބަރުން އެހެން ޕާޓީތަކަށް ސޮއިކުރަން އުޅޭކަމުގެ އަޑުތަކެއް ވެސް ވަނީ ފެތުރިފަ އެވެ.