ދަރިންގެ ކަންތައްތައް ފިޔަވައި އެހެން އެއްވެސް ކަމެއް އޭނާއަށް މުހިއްމު ނޫން ކަމަށް ހޮލީވުޑްގެ މަޝްހޫރު ތަރި އެންޖެލީނާ ޖޯލީ ބުނެފި އެވެ.

"ގުޑް މޯނިން އެމެރިކާ ޝޯ"އަށް ދިން އިންޓަވިއުއެއްގައި އެންޖެލީނާ އިތުރަށް ބުނީ އޭނާގެ ހަޔާތް މިހާރު އެނބުރެނީ އޭނާގެ ހަ ދަރިންގެ ވަށައިގެން ކަމަށެވެ.

ފިލްމީ ދާއިރާގައި އޭނާ ކުރާ މަސައްކަތްތައް ފިޔަވައި އެހެން ކަމަކަށް އެހާ ބޮޑު މުހިއްމުކަމެއް ދެންތޯ ސުވާލު ކުރެވުމުން އެންޖެލީނާ ދިން ޖަވާބުގައި ބުނެފައިވަނީ މައެއްގެ ގޮތުގައި އޭނާ ކުރަން ޖެހޭ ކަންކަމަކީ އޭނާ މިހާރު އެންމެ އަހައްމިއްޔަތުކަން ދޭ ކަންތައް ކަމަށެވެ.

"އަހަރެންގެ އެހެން ހުރިހާ އެއްޗެއް ގެއްލުނަސް ފަރުވާލެއް ނެތް. ދަރިންނަކީ އަހަރެންގެ ހަޔާތުގެ އުފާވެރިކަން" އެންޖެލީނާ ބުންޏެވެ.

އެންޖެލީނާ މިހެން ބުނެފައި މިވަނީ އޭނާއާއި އޭނާގެ ދަރިންގެ ބައްޕަ ބްރެޑް ޕިޓްގެ ވަރީގެ މައްސަލަ ކޯޓުގައި ކުރިއަށްދާ ދަނޑިވަޅެއްގަ އެވެ.

ބައޮޕިކްއެއް ކަމަށްވާ "މާރިއާ"އިން އެންމެ ފަހުން ފެނުނު އެންޖެލީނާ އަންނަނީ ފަރުދާގެ ފުރަގަހުގައި އޭނާގެ ދަރިންނާއެކު ވީހާވެސް ގިނަ ވަގުތު ހޭދަކުރަމުން ކަމަށް ރިޕޯޓުތައް ބުނެ އެވެ.