ހޮލީވުޑްގެ މަޝްހޫރު ލަވަކިޔުންތެރިޔާ އޭބެލް މައްކޮނެން ތެސްފޭ (ދަ ވީކެންޑް)އާއި މަޝްހޫރު ބަތަލާ އެންޖެލީނާ ޖޯލީގެ ދެމެދު ލޯބީގެ ގުޅުމެއް އުފެދުނު ކަމަށް ހޮލީވުޑްގައި ވާހަކަ ދެކެވުނެވެ.

މީގެ ކުރިން ވެސް ވީކެންޑާއި އެންޖެލީނާއާ ދެމެދު ގުޅުމެއްވާ ކަމަށް އެދެ ފަންނާނުންގެ ފޭނުން ޝައްކުކޮށްފައިވާއިރު، ފޭނުންގެ ޝައްކު އިތުރަށް ޔަގީންވެގެން ދިޔައީ، ވީކެންޑް ނެރުނު ލަވައެއްގެ ލިރިކްސްގައި، އެންޖެލީނާއަށް އަމާޒުވާފަދައިން ބަސްތައް އިބާރާތްކޮށްފައި އޮތުމުންނެވެ.

އެލަވައިގެ ލިރިކްސްގައި އޭނާގެ ލޯބިވެރިއަކީ މޫވީ ސްޓާރެއް ކަމަށް ވެސް ވީކެންޑް ބުނެފައިވެ އެވެ. ވީކެންޑްގެ މި ލިރިކްސްއާއެކު ގިނަ ބަޔަކު އޭނާ އެންޖެލީނާ އާ ލޯބީގެ ގޮތުން ގުޅިފައިވާކަން ޔަގީންކުރި އެވެ. ހަމައެހެންމެ އެދެމީހުން ވެސް މިކަމަކަށް އޭރު ދެކޮޅު ހަދާފައެއް ނުވެ އެވެ.

ނަމަވެސް އިނގިރޭސި ނޫސްތަކަށް ދިން އިންޓަވިއުތަކުގައި އެދެތަރިން ވެސް އެ ދެތަރިންނާ ގުޅުވައިގެން ދެކެވޭ ވާހަކަތައް ދޮގުކޮށްފަ އެވެ.

އެ ދެތަރިންނަކީ ވެސް ލޯބިވެރިން ނޫންކަމަށާއި، އެހެން ނަމަވެސް ވަރަށް ގާތް ރަހުމަތްތެރިން ކަމަށް އެންޖެލީނާ އާއި ވީކެންޑް ބުނެފައިވެ އެވެ.

އެގޮތުން އެކަކު އަނެކަކަށް އެކި ކަންކަން ކުރުމުގައި އެއްބާރުލުން ދޭކަން ފާހަގަކޮށް އުފެއްދުންތެރި މަސައްކަތްތައް ކުރުމުުގައި ދެމީހުން ވެސް އެކުގައި މަސައްކަތްކުރާ ކަމަށް އެމީހުން ބުންޏެވެ.