ބޮލީވުޑްގެ ޒުވާން ތަރި އަނަަންޔާ ޕާންޑޭއަށް އެކި ގޮތްގޮތުން ކުރިމަތިވި ފުރައްސާރައިގެ ސަބަބުން ނަފްސާނީ ގޮތުން ނޭދެވޭ އަސަރުކުރި ކަމަށް އޭނާ ބުނެފި އެވެ.

"މޯޖޯ ސްޓޯރީ"އަށް ދިން އިންޓަވިއުއެއްގައި އަނަންޔާ ބުނީ ބޮލީވުޑަށް ނުކުތް ފުރަތަމަ ދުވަސްވަރު އާއްމުންގެ ފަރާތުން ވަރަށް ބޮޑަށް ފުރައްސާރަ އަމާޒުވި ކަމަށެވެ. އެކަމުގެ ސަބަބުން އޭނާގެ ނަފްސާނީ ގޮތުން މީހާއަށް ނޭދެވޭ އަސަރުކޮށް އާއިލާގެ އެހީއާއެކު ކައުންސެލިންއާއި ތެރަޕީ ހޯދި ކަމަށް ވެސް އޭނާ ބުންޏެވެ.

އަނަންޔާއަކީ އޭނާގެ އެކްޓް ކުރުމުގެ ހުނަރާއި ބޮލީވުޑްގައި މިހާރު އެންމެ އަގުގަދަކޮށް ކުރިއަށްދާ "ނެޕޮޓިޒަމް"ގެ ސަބަބުން ފުރައްސާރަ އަމާޒުވި ތަރި އެކެވެ. އެގޮތުން އޭނާގެ ކިބައިގައި އެކްޓް ކުރުމުގެ ހުނަރު އެއްވެސް ވަރަކަށް ނެތް ކަމަށާއި ބޮލީވުޑްގައި ކުރިއަށް ދެވުނީ އޭނާގެ ބައްޕަ ޗަންކީ ޕާންޑޭއަކީ ބޮލީވުޑް އާއިލާއަށް ނިސްބަތްވާ ފަރާތަކަށް ވުމުން ކަމަށް މީހުން ބުންޏެވެ.

އަނަންޔާގެ ފާހަގަކޮށްލެވޭ ފިލްމުތަކުގެ ތެރޭގައި "ސްޓޫޑަންޓް އޮފް ދަ އިޔާ 2"، "ކޯ ގަޔޭ ހަމް ކަހާން" އަދި "ގެހްރާއިޔާން" ފަދަ ފިލްމުތައް ހިމެނެ އެވެ.