ބޮލީވުޑްގެ ގިނަ ފިލްމުތަކަކުން ފެނިފައިވާ އެކްޓްރެއް ކަމަށްވާ ކަލްކީ ކޮއެޗްލިންއަކީ އާއްމުން ހީކުރާހާ ކާމިޔާބު މީހެއް ނޫން ކަމަށް އޭނާ ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ކަލްކީ ބުނީ މީޑިއާގައި އޭނާގެ "އިމޭޖް" އޮތް ގޮތާއި އޭނާގެ އަސްލު ދިރިއުޅުމާ ހާސްބައި ތަފާތު ކަމަށެވެ. އެގޮތުން މީޑިއާގައި އޭނާއަކީ ކާމިޔާބު މީހެއްގެ ގޮތުގައި ބެލެވުނު ނަމަވެސް ހަގީގަތުގައި ބޮލީވުޑުން އޭނާއަށް މާ ބޮޑު ކާމިޔާބީއެއް ނުލިބޭ ކަމަށް ކަލްކީ ބުންޏެވެ.

"އަހަންނަކީ ކާކުކަން އެންމެންނަށް ވެސް އެނގޭ. އެކަމަކު އެންމެންނަށް ހީވެފައި އޮންނަ ގޮތާ ހިލާފަށް އަހަންނަކީ އެހާ ކާމިޔާބު މީހެއް ނޫން،" ކަލްކީ ބުންޏެވެ.

އެއާއެކު އެ ދާއިރާއިން އޭނާއަށް ލިބޭ އާމްދަނީ ވެސް ވަރަށް ކުޑަ ކަމަށާއި ބައެއް ފަހަރު ޒަރޫރީ ބޭނުންތައް ފުއްދުމުގައި ވެސް ދަތިތަކެއް ކުރިމަތިވާ ކަމަށް ކަލްކީ ފާހަގަކުރި އެވެ.

2008 ވަނަ އަހަރު ބޮލީވުޑަށް ތައާރަފްވި ކަލްކީގެ މަޝްހޫރު ފިލްމުތަކުގެ ތެރޭގައި "ގަލީ ބޯއީ"، "ޒިންދަގީ ނާ މިލޭގީ ދޯބާރާ" އަދި "ޔޭ ޖަވާނީ ހޭ ދިވާނީ" ހިމެނެ އެވެ.