ހޮލީވުޑްގެ މަޝްހޫރު ރެޕް ލަވަކިޔުންތެރިޔާ ޑިޑީ ހައްޔަރުކުރުމާއެކު އޭނާގެ ކުރީގެ ލޯބިވެރިޔާ ޖެނިފާ ލޮޕޭޒް ބޭރަށް ނުކުމެ އުޅުން މަދުކޮށްފައިވާ ކަމަށް ހަބަރުތައް ބުނެފި އެވެ.

ޖިންސީ ފުރައްސާރައިގެ މައްސަލައެއްގައި ޑިޑީ ހައްޔަރު ކުރެވުނު ފަހުން ޖޭލޯ ބޭރު ތެރެއިން ފެންނަ މިންވަރު މަދުވެފައިވާ ކަމަށާއި އޭގެ ބޭނުމަކީ ޑިޑީއާ ބެހޭ ސުވާލުތައް އަމާޒުވުން މަދުކުރުން ކަމަށް ރިޕޯޓުތައް ބުނެ އެވެ. އެއާއެކު ޑިޑީ ހައްޔަރު ކުރުމުގެ ސަބަބުން ޖޭލޯއަށް އެންޒައިޓީއާއި އެ ނޫން ވެސް ނަފްސާނީ އުނދަގޫތަކެއް ވެސް ކުރިމަތި ވަމުން އަންނަ ކަމަށް ބުނެވެ އެވެ.

ޑިޑީއާއި ޖޭލޯއަކީ 1999 އަހަރުން ފެށިގެން 2001 ވަނަ އަހަރާ ހަމައަށް ލޯބީގެ ގޮތުން ގުޅިގެން އުޅުނު މީޑިއާގެ ސަމާލުކަން ހޯދި ޖޯޑެކެވެ.

ލޯބީގެ ގުޅުން ނިމުމަށްފަހު ވެސް އެ ދެމީހުންގެ މެދުގައި ގާތް އެކުވެރިކަން އޮންނައިރު ޑިޑީއަށް ކުރިމަތިވަމުން އަންނަ ގާނޫނީ ގޮންޖެހުންތަކާއެކު ޖޭލޯއަށް ފުން އަސަރުތަކެއް ކޮށްފައިވާ ކަމަށް ހަބަރުތައް ބުނެ އެވެ.

ޑިޑީއަށް ކުރެވިފައިވާ ތުހުމަތުތަކުގެ ޝަރީއަތް ބޭއްވުމަށް ހަމަޖެހިފައިވަނީ އަންނަ އަހަރުގެ މެއި މަހުގެ 25 ވަނަ ދުވަހު އެވެ. ކާފާލާތުގެ ދަށުން މިނިވަން ވުމަށް ޑިޑީ އެތައް ފަހަރެއްގެ މަތިން ހުށައެޅި ނަމަވެސް މިހާތަނަށް އެއިން އެއްވެސް ހުށައެޅުމެއް ގަބޫލު ކުރެވިފައެއް ނުވެ އެވެ.