މައިންބަފައިންގެ ކައިވެނި ރޫޅުމުން ނަފްސާނީ ސިއްހަތަށް އެކަމުގެ ނޭދެވޭ އަސަރުކުރި ކަމަށް ބޮލީވުޑްގެ ޒުވާން ތަރިއެއް ކަމަށްވާ އިރާ ޚާން ބުނެފި އެވެ.

އާމިރު ޚާންއާއި އޭނާގެ ފުރަތަމަ އަންހެނުން ރީނާ ދައްތާއަށް ލިބުނު ދެ ދަރިންގެ ތެރެއިން ހަގު ދަރިފުޅު ކަމަށްވާ އިރާއަކީ އަބަދުވެސް އެނާގެ ނަފްސާނީ ސިއްހަތުގެ ވާހަކަ ފާޅުގައި ދައްކާ ތަރި އެކެވެ.

މިފަހުން ޕިންކް ވިލާއަށް ދިން އިންޓަވިއުއެއްގައި އިރާ ވަނީ ނަފްސާނީ ކަންކަމަށް ބޭސްކުރަން ފެށުމާއި އެކަމުގައި އޭނާގެ މައިންބަފައިން އަމަލުކުރި ގޮތް ކިޔައިދީފަ އެވެ.

އެގޮތުން 2018 ވަނަ އަހަރު އޭނާ ބޭސްކުރަން ފެށި ކަމަށާއި އެންމެ ފުރަތަމަ އޭނާގެ މައިންބަފައިންނަށް އެކަން ނޭނގޭނެ ކަމަށް އިރާ ބުންޏެވެ.

އެހެން ނަމަވެސް އެކަން އެ ދެމީހުންނަށް އެނގުމުން ވަރަށް ކަންބޮޑުވުން ފާޅުކުރި ކަމަށާއި ފާޅުގައި ނުބުނި ނަމަވެސް އޭނާގެ ހާލަތަށް އޭނާގެ މައިންބަފައިން އެމީހުންގެ އަމިއްލަ ނަފްސަށް ތުހުމަތުކުރި ކަތަށް ވެސް އިރާ ބުނެފައިވެ އެވެ.

1986 ވަނަ އަހަރު ކައިވެނިކުރި އާމިރުއާއި ރީނާގެ ކައިވެނި ރޫޅުނީ 2002 ވަނަ އަހަރު އެވެ. އޭރު އިރާގެ އުމުރަކީ އެންމެ ފަސް އަހަރެވެ.