ބޮލީވުޑްގެ ވެޓެރަން އެކްޓަރެއް ކަމަށްވާ ދަރްމެންދްރާ އޭނާގެ ސޯޝަލް މީޑިއާ ޕްލެޓްފޯމްގައި ޖާޔާ ބައްޗަށްއަށް ހާއްސަކޮށް ޕޯސްޓެއް ކޮށްފި އެވެ.

"ރޮކީ އޯރް ރާނީ ކީ ޕްރޭމް ކަހާނީ"ގެ ސެޓުގައި ނަގާފައިވާ ފޮޓޯއެއް ހިއްސާކޮށްފައިވާ އެ ޕޯސްޓުގައި ދަރްމެންދްރާ ބުނެފައިވަނީ ޖާޔާއަކީ އަބަދުވެސް އޭނާގެ "ގުއްޑީ" ކަމަށެވެ.

"ގުއްޑީ"އަކީ ޖާޔާއާއި ދަރުމެންދްރާ އެކުގައި ފެނުނު އެންމެ ފުރަތަމަ ފިލްމަށްވާއިރު އެ ފިލްމަށް އޭރުވެސް އާއްމުންގެ ބޮޑު ތަރުހީބެއް ލިބިފައިވެ އެވެ.

އޭގެ ފަހުން އެ ދެމީހުން އެކުގައި ފެނިގެންދިޔަ ފިލްމުތަކުގެ ތެރޭގައި "ޗުޕްކޭ ޗުޕްކޭ"، "ޕިޔާކޭ ގަރް" އަދި "ރޮކީ އޯރް ރާނީ ކީ ޕްރޭމް ކަހާނީ" ހިމެނެ އެވެ.

ދަރުމެންދްރާ އިތުރަށް ބުނެފައިވަނީ ޖާޔާއަކީ ދުނިޔޭގެ ފެންވަރުގެ އެކްޓަރެއް ކަމަށާއި ޖާޔާއަކީ އަބަދުވެސް އޭނާއަށް އެކި ކަންކަމުގައި ހިތްވަރުދޭ އެކުވެރިއެއް ކަމަށެވެ.

1970އާއި 80ގެ އަހަރުތަކުގައި ބޮލީވުޑްގެ އެންމެ ކުރީ ސަފުގައި ގުނާލެވުނު ދަރްމެންދްރާއާއި ޖާޔާއަކީ އާއްމުންގެ މަގުބޫލުކަން ވެސް ހޯދި ޖޯޑެކެވެ.