މޯލްޑިވްސް މީޑިއާ ހައުސްގެ ނަމުގައި ރަޖިސްޓްރީކޮށްފައިވާ ކުންފުންޏެއްގެ ދަށުން ހިންގާ އެމްއެމް ޓީވީ ހިންގުމުގެ އިސް ދައުރެއް ރައީސް އޮފީހުގެ ކޮމިޔުނިކޭޝަން މިނިސްޓަރު އިބްރާހީމް ޚަލީލާއި ރައީސް އޮފީހުގެ ޑެޕިއުޓީ އަންޑާ ސެކްރެޓަރީ މުހައްމަދު އިކްރާމް އަބްދުއްލަތީފް އަދާކުރާކަން އެނގިއްޖެ އެވެ.

"ހުރިހާ"އާ ވާހަކަދެއްކި އެތަނުގެ އިސް އޮފިޝަލަކު ނަން ނުޖެހުމަށް އެދި ބުނީ އެމްއެމް ޓީވީ ހިންގުމުގައި ޚަލީލް އާއި އިކްރާމް ގެންދަނީ ބައިވެރިވަމުންނެވެ. އެގޮތުން އެ އެތަނުގައި ބާއްވާ ބައެއް ބައްދަލުވުންތަކުގައި ބައިވެރިވެ، ޚަލީލް އެތަނުގެ މަސައްކަތްތަކާ ބެހޭ ގޮތުން ލަފާ ދެމުން ކަމަށް އެތަނުގެ މުވައްޒަފަކު ނަން ނުޖެހުމަށް އެދި ބުންޏެވެ.

ނަމަވެސް އެ ހަލީލް ވަނީ އެ ތުހުމަތުތައް ދޮގުކޮށްފަ އެވެ.

އެ ޓީވީއަށް ބޭނުންވާ މުވައްޒަފުން ގެނުމާއި މުވައްޒަފުން ވަޒީފާއިން ވަކިކުރުމުގެ ކަންކަން ކުރިއަށްދަނީ ސީދާ އިކްރާމްގެ ބެލުމުގެ ދަށުންނެވެ. އެގޮތުން ރައީސް އޮފީހުގެ ކޮމިޔުކޭޝަން ޑިޕާޓްމަންޓްގައި މަސައްކަތްކުރާ ބައެއް މުވައްޒަފުން ވެސް ޓީވީ ހިންގުމުގައި ބައިވެރިވެ އެވެ.

ރައީސް މުއިއްޒުގެ ގެކޮޅު މ. ދިމްޔާތުގައި މަސައްކަތް ކުރާ ހއ. ވަށަފަރު މީހެއް ކަމަށްވާ ޒާހިރުގެ ނަމުގައި ރަޖިސްޓްރީކޮށްފައިވާ ކުންފުންޏަކުން ހިންގާ އެމްއެމް ޓީވީއަށް ގިނަ އަދަދެއްގެ މުވައްޒަފުން ނެގުމަށް ވަނީ އިއުލާންކޮށްފަ އެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ ޕީއެސްއެމްގެ ނަމުގައި ދޫކުރި ލޯނެއްގެ ތެރެއިން އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ކުރިން ވިދާޅުވި އެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް އޭނާ ވިދާޅުވި އެވެ.

"މިތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައި. އެކަމަކު ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް،" އެ އޮފިޝަލް ވިދާޅުވި އެވެ.

ރައީސް މުއިއްޒު ޕްރޮމޯޓްކުރުމަށް ސަރުކާރުގެ ބައެއް އިސްވެރިން ގެންދަވަނީ ދައުލަތުގެ އިދާރާތަކުގެ މުދަލާއި ފައިސާ ނަހަމަ ގޮތުގައި ބޭނުންކުރައްވަމުންނެވެ.