މި ހަފްތާގެ ތެރޭގައި ބޮލީވުޑް ހަބަރުތަކުން އެންމެ ފާހަގަވި އެއް ހަބަރަކީ އަރަމުން އަންނަ ތަރި ވިކްރާންތު މަސީ ބޮލީވުޑުން ރިޓަޔާ ކުރަން ނިންމި ހަބަރެވެ.

ސޯޝަލް މީޑިއާ ޕޯސްޓެއް މެދުވެރިކޮށް 2025 ވަނަ އަހަރަކީ ވިކްރާންތު އެންމެ ފަހުން ބެލުންތެރިންނަށް ފެންނާނެ އަހަރު ކަމަށް ބުނުމުން ގިނަ ބަޔަކު ކަންބޮޑުވުން ފާޅުކުރި އެވެ.

ވިކްރާންތުގެ އެ ޕޯސްޓާއެކު ސޯޝަލް މީޑިއާގައި ހިޔާލު ފާޅުކުރިއިރު ބައެއް މީހުން ވަނީ އެއީ އޭނާގެ ކުރިއަށް އޮތް ފިލްމު ޕްރޮމޯޓް ކުރަން ޖެއްސި ސްޓަންޓެއް ކަމަށް ވެސް ބުނެފަ އެވެ.

މީޑިއާގައި މި އަޑުތައް ގަދަވުމާއެކު އެންމެ ފަހުން ވިކްރާންތު މިވަނީ އޭނާ ކުރި ޕޯސްޓު މާނަ ކުރި ގޮތް އާއްމުންނަށް ބުނެދީފަ އެވެ.

އެގޮތުން ވިކްރާންތު ބުނީ އޭނާގެ ޕޯސްޓުގެ މަގުސަދަކަށްވީ ބޮލީވުޑުން ރިޓަޔާ ކުރަން އުޅޭކަން ދޭހަ ކުރުން ނޫން ކަމަށެވެ. އެހެން ނަމަވެސް ދިގު މުއްދަތަކަށް ދާއިރާއާ ދުރަށް ދާން ނިންމާފައިވާ ކަމަށް އޭނާ ބުންޏެވެ.

ވިކްރާންތު އިތުރަށް ބުނެފައިވަނީ އޭނާ މިވަގުތު ބޭނުންވަނީ ޒާތީ ދިރިއުޅުމަށާއި އޭނާގެ އަމިއްލަ ސިއްހަތަށް ވަގުތު ދޭން ކަމަށެވެ.

ވިކްރާންތުއަކީ ބޮލީވުޑްގެ ތަފާތު ފިލްމުތަކަކުން ފެނިފައިވާ ފަންނާނެކެވެ. އެގޮތުން "ހަސީން ދިލްރުބާ" އަދި "ޓުވެލްވްތު ފެއިލް"އަކީ އޭނާގެ ފާހަގަކޮށްލެވޭ މަސައްކަތް ތަކެވެ.