މެދު އިރުމަތީގެ ފާހަގަކޮށްލެވޭ މުނިފޫހި ފިލުވުމުގެ އިވެންޓެއް ކަމަށްވާ ރެޑް ސީ ފިލްމު ފެސްޓިވަލްގައި ބޮލީވުޑްގެ މަޝްހޫރު ތަރި އާމިރު ޚާންއަށް ހާއްސަ އެވޯޑެއް ދޭން ނިންމައިފި އެވެ.

މިއަދުން ފެށިގެން މި މަހުގެ 14 ވަނަ ދުވަހާ ހަމައަށް ސައޫދީ އަރަބިއާގެ ޖިއްދާގައި ކުރިއަށްދާ އެ ފިލްމު ފެސްޓިވަލްގައި ދުނިޔޭގެ އެކި ކަންކޮޅުތަކުން ފާހަގަކޮށްލެވޭ ތަރިންނަށް އެވޯޑު ދެ އެވެ.

އެގޮތުން އާމިރުގެ އިތުރުން އެ އެވޯޑު ދޭ އެހެން ތަރިންގެ ތެރޭގައި ހޮލީވުޑްގެ ތަރި އެމިލީ ބްލަންޓްއާއި މިސްރުގެ އެކްޓްރެސް މޯނާ ޒަކީ ހިމެނެ އެވެ.

މިރޭ ބާއްވަން ހަމަޖެހިފައިވާ އެ ފެސްޓިވަލްގެ ހުޅުވުމުގެ ރަސްމިއްޔާތުގައި އެ ތިން ފަރާތުގެ ފިލްމީ މަސައްކަތްތަކަށް ބަލާލައި ހާއްސަ "ޓްރިބިއުޓެއް" ދޭނެ އެވެ.

އާމިރު ޚާންއަކީ ބޮލީވުޑްގައި ގިނަ ކާމިޔާބީތަކެއް ހޯދާފައިވާ ތަރިއެކެވެ. އޭނާގެ ފާހަގަކޮށްލެވޭ ފިލްމުތަކުގެ ތެރޭގައި "ތުރީ އިޑިއަޓްސް،"، "ޕީކޭ" އަދި އޮސްކާއަށް ނޮމިނޭޓްވި "ލަގާން" ހިމެނެ އެވެ.

މި ފެސްޓިވަލްގައި މުނިފޫހި ފިލުވުމުގެ ދާއިރާގައި ފާހަގަ ކޮށްލެވޭ ބައެއް ފަރާތްތަކުން ވާހަކަ ވެސް ދައްކާނެ އެވެ. އެގޮތުން ބޮލީވުޑްގެ ތަރި ރަންބީރު ވެސް ވާހަކަ ދައްކާނެ އެވެ.