ރައީސް މުހައްމަދު މުއިއްޒު އިއުލާން ކުރައްވާފައިވާގޮތަށް، ސިޔާސީ މުވައްޒަފުން ވަކިކުރި އަދަދުކަމަށް ބުނެ ސަރުކާރުގެ ތަރުޖަމާނު ހާމަކުރެއްވި އަދަދާއި ރައީސް އޮފީހުގެ އަދަދު ދިމާނުވާކަން ހާމަވެއްޖެ އެވެ.

ނޮވެމްބަރު އެއްވަނަ ދުވަހު ސަރުކާރުގެ ތަރުޖަމާނު ހީނާ ވަލީދު ކުރެއްވި އެކްސް ޕޯޓްގައި ވިދާޅުވެފައިވަނީ ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، 31 އޮކްޓޯބަރު 2024 ގެ ނިޔަލަށް 248 ސިޔާސީ މުވައްޒަފުން ވަކިކޮށްފައިވާ ކަމަށެވެ.

ނަމަވެސް މައުލޫމާތު ހޯދައި ލިބިގަތުމުގެ ގާނޫނުގެ ދަށުން އަހުމަދު އަފްރާހު އިސްމާއީލް ނަމަކަށް ކިޔާ އަމިއްލަ ފަރާތަކުން އެ މުއްދަތުގައި ވަކިކުރި ސިޔާސީ މުވައްޒަފުންގެ އަދަދާއި އެމީހުންގެ ނަންތައް ހޯދުމަށް ހުށަހެޅުމުން މިއަދު ރައީސް އޮފީހުން ހާމަކޮށްފައިވާ މައުލޫމާތުގައި ބުނެފައިވަނީ އޮކްޓޯބަރު މަހުގެ 31 ވަނަ ދުވަހުގެ ނިޔަލަށް ސިޔާސީ 228 މުވައްޒަފުން މަގާމުން ވަކިކޮށްފައިވާ ކަމަށެވެ.

މިއަދު ރައީސް އޮފީހުން ހާމަކޮށްފައިވަނީ ވަކި ކުރި މުވައްޒަފުންގެ އަދަދު އެކަނިކަން ފާހަގަކޮށްލެވެ އެވެ. ވަކި ކުރި ފަރާތްތަކުގެ ނަމާއި މަގާމު އަދި މަސައްކަތްކުރި މިނިސްޓްރީއަކީ ޒާތީ މައުލޫމާތުކަމަށް ބުނެ ވަނީ ހާމަކުރަން ދެކޮޅު ހަދާފަ އެވެ.

ނަމަވެސް މައުލޫމާތު ހޯދައި ލިބިގަތުމުގެ ޤާނޫނުގައި ޒާތީ މައުލޫމާތު ކަމަށް ބެލެވިދާނެ މައުލޫމާތަކީ ކޮބައިކަން ތަފްސީލުކޮށް ބުނެދީފައިވާއިރު، ރައްޔިތުންގެ މަސްލަހަތު ހިމެނޭ އިސް މަގާމުތަކުގައި ތިއްބަވާ ސިޔާސީ ވެރިންގެ ނަމާއި މަގާމު ޒާތީ މައުލޫމާތު ތެރޭގައި ނުހިމެނޭކަމަށް އިންފޮމޭޝަން ކޮމިޝަނުން މިފަދަ މައްސަލަތަކުގައި އެތައް ފަހަރަކު ކޯޓުގައި ބުނެފައިވެ އެވެ. އަދި އެއީ ހާމަކުރަން ޖެހޭ މައުލޫމާތުކަމަށް އެ ކޮމިޝަނުން ކަނޑައަޅާފައިވެ އެވެ.

އެހެންކަމުން ރައީސް އޮފީހުން މައުލޫމާތު ހާމަކުރަން ދެކޮޅު ހެދުމާއި ތަރުޖަމާނު ހީނާ ވަލީދާއި ރައީސް އޮފީހުގެ އަދަދު ދިމާނުވުމުން ސަރުކާރުން ސިޔާސީ މަގާމު މަދުކުރި ކަމަށް ބުނެ ދައްކާ ވާހަކައާއި މެދު ގިނަ ބަޔަކު ދަނީ ސުވާލު އުފައްދަމުންނެވެ.