މާލޭގެ މަގުތަކުގައި އުޅޭ ބުޅާތައް ގެންގުޅެއް ހުޅުމާލޭގައި ހަދާފައިވާ ބުޅާ ފެސިލިޓީ ނުވަތަ "އޮޅުހިޔާ" ހުރީ ބުޅާތައް ބަދަލުކުރެވޭ ހާލަތުގައި ކަމަށާއި ނަމަވެސް ބުޅާތައް ގެންދަން ފެސިލިޓީ ހުރީ ތައްޔާރީ ހާލަތުގައި ނޫން ކަމަށް ސަރުކާރުން ބުނަނީ ކަންކަން ވިޔަ ނުދޭން އުޒުރެއްގެ ގޮތުގައި ކަމަށް މާލޭ މޭޔަރު އާދަމް އާޒިމް ވިދާޅުވެއްޖެ އެވެ.

ބުދަ ދުވަހު ބޭއްވި މާލޭ ސިޓީ ކައުންސިލްގެ ބައްދަލުވުމުގައި ވާހަކަދައްކަވަމުން އާޒިމް ވިދާޅުވީ މާލޭ ސަރަހައްދުގެ މަގުތަކުގައި އުޅޭ ބުޅާތައް ގެންދަން ހެދި އޮޅުހިޔާ މަރުކަޒަކީ މާލޭގައި ބުޅާ ގިނަވެ ކުރިމަތިވެފައިވާ އާންމު އުދަނގުލަށް ހައްލެއް ހޯދުމަށް މާލެ ސިޓީ ކައުންސިލުގެ އިސްނެގުމުގެ މަތިން ގާއިމު ކުރި ތަނެއް ކަމަށެވެ.

އަދި އެ ތަނަކީ ސިޓީ ކައުންސިލުގެ ބަޖެޓުން ބޮޑު ޚަރަދުކޮށްގެން އެ ކައުންސިލްގެ މުވައްޒަފުންގެ ބުރަ މަސައްކަތުން ނިންމާފައިވާ ތަނެއް ކަމަށް އާޒިމް ވިދާޅުވި އެވެ.

އާޒިމް ވިދާޅުވީ ސަރުކާރުން ސިޓީ ކައުންސިލް އަތުން އޮޅުހިޔާ އަތުލަން މަސައްކަތް ކުރާއިރު، އެ ކައުންސިލުގެ ބަޖެޓުން ކުރި ހުރިހާ ޚަރަދެއް ލިބެން ޖެހޭނޭ ކަމަށާއި އޮޅުހިޔާ ހެދުމަށް ސަރުކާރުން އެއްވެސް ބަޖެޓެއް ސިޓީ ކައުންސިލަށް ދީފައި ނުވާކަމަށެވެ.

"އޮޅުހިޔާ ސިޓީކައުންސިލް އަތުން އަތުލަންޏާ އެތަން ހަދަން ދިއަ ހަރަދު ވެސް އަޅުގަނޑުމެންނަށް ލިބެން އެބަޖެހޭ. އެ ފެސިލިޓީ މަރުކަޒު ހެދާފައި އެވަނީ ސިޓީ ކައުންސިލްގެ ބަޖެޓުން. އެއްވެސް ބަޖެޓެެެއް މިތަނަކަށް ލިބިފަކާ ނެތް މިކަން ކުރުމަކަށް. ހަމަ ފުލީ މިތަނުގެ ބަޖެޓުން މިތާ މުވައްޒަފުން ހުރިހާ ކަމެއް ކުރީ، ފެސިލިޓީ ރެޑީކޮށް އެހުރީ، މިހާރު ބުޅާ ގެންދެވޭނެ، އެތާ ބުޅާ ބޭތިއްބޭނެ." އާޒިމް ވިދާޅުވި އެވެ.

އާޒިމް ވިދާޅުވީ ބުޅާ ފެސިލިޓީގެ މަސައްކަތް މިހާރު ނިންމާފައި އެހުރީ އެނިމަލް އެންޑް ވެލްފެއާ މިނިސްޓްރީ އާއެކު ކައުންސިލުން އެއްބަސްވި ގޮތަށް ކަމަށާއި ނަމަވެސް އިރުކޮޅުކޮޅުން އައު ބަދަލު ގެންނަން ބުނާ ކަމަށް އާޒިމް ވިދާޅުވި އެވެ.