ބޮލީވުޑްގެ އެންމެ ނުފޫޒުގަދަ އެއް އާއިލާ ކަމަށްވާ ރޯޝަން އާއިލާގެ ކުރިއެރުން ދައްކުވައިދޭ ޑޮކިއުމެންޓްރީ ސީރީޒްއެއް ނެރެން ނެޓްފްލިކްސްއިން އިއުލާން ކޮށްފި އެވެ.

"ދަ ރޯޝަންސް"ގެ ނަމުގައި ނެރެން ހަމަޖެހިފައިވާ އެ ސީރީޒްއަކީ އެ އާއިލާގެ ފާހަގަކޮށްލެވޭ ޝަހްސިއްޔަތުން ކަމަށްވާ ރޯޝަން ލާލް، ރާޖޭޝް ރޯޝަން، ރާކޭޝް ރޯޝަން އަދި ރިތިކް ރޯޝަންގެ ދިރިއުޅުމަށް އަލިއަޅުވާލާ ތައްޔާރުކުރާ ސީރީޒް އެކެވެ.

އެ ސީރީޒްގައި އެ ތަރިންގެ ބޮލީވުޑް ހަޔާތުގައި ލިބުނު ފުރުސަތުތަކާއި ހާސިލްކޮށްފައިވާ ކާމިޔާބީތައް ފެންނާނެ ކަމަށް ހަބަރުތައް ބުނެ އެވެ.

"ދަ ރޯޝަންސް"ގެ ޕޯސްޓަރެއް ސޯޝަލް މީޑިއާގައި އާއްމު ކުރަމުން ނެޓްފްލިކްސްއިން ބުނީ ރޯޝަން އާއިލާއަކީ ބޮލީވުޑްގައި ފާހަގަކޮށްލެވޭ އާއިލާއެއް ކަމަށާއި އެ ސީރީޒްއަކީ ޝައުގުވެރި ސީރީޒްއަކަށް ވާނެ ކަމަށެވެ.

މިކަމާ ގުޅިގެން ރޯޝަން އާއިލާއިން ބުނީ ނެޓްފްލިކްސްއާއެކު މަސައްކަތް ކުރުމަކީ އެ އާއިލާއަށް ލިބޭ އުފަލެއް ކަމަށާއި އެއާއިލާއާ ބެހޭގޮތުން އާއްމުންނަށް މިހާތަނަށް އެނގިފައިނުވާ އެތައް ކަމެއް އެ ސީރީޒްއިން އެނގިގެންދާނެ ކަމަށެވެ.

މި ސީރީޒްގެ ޕޯސްޓް ޕްރޮޑަކްޝަންގެ މަސައްކަތް ކުރިއަށްދާއިރު އެ ސީރީޒް ރިލީޒް ކުރާނެ ތާރީހެއް ނެޓްފްލިކްސްއިން އަދި ހާމަކޮށްފައެއް ނުވެ އެވެ.