މަޝްހޫރު އިންފްލުއެންސަރު ކްލޯއީ ކާޑޭޝަންގެ ސިއްރު މައުލޫމާތުތަކެއް އޭނާގެ ތެރަޕިސްޓް މީޑިއާއަށް ހާމަކުރި ކަމަށް ކްލޯއީ ބުނެފި އެވެ.

ބަސްލްއަށް ދިން އިންޓަވިއުއެއްގައި ކްލޯއީ ބުނީ މީގެ ކުރިން އޭނާއަށް ފަރުވާދިން ތެރަޕިސްޓަކު ވަނީ އޭނާގެ އިތުބާރަށް ކޮޅުފައިން އަރާ ތެރަޕީ ސެޝަންތަކުގައި ހިއްސާކުރި ބައެއް މައުލޫމާތު މީޑިއާއަށް ހާމަކޮށްފައި ކަމަށެވެ.

އެ ހާދިސާގެ ސަބަބުން ތެރަޕީ ނެގުން ހުއްޓާލައި ނަފްސާނީ ފަރުވާ ހޯދުމާ ދުރުގައި ވެސް ގިނަ ދުވަސްތަކެއް ހޭދަކުރި ކަމަށް ކްލޯއީ ބުނެފައިވެ އެވެ.

"އަހަރެން ދިޔައީ ތެރަޕިސްޓެއްގެ ކައިރިން ފަރުވާ ހޯދަމުން. ދެން ފެނުނީ އޭނާއަށް ނޫން އެހެން މީހަކަށް ކިޔައިނުދޭ އެތައް ކަމެއް ނޫސްތަކުގެ ފަލަ ސުރުހީއަށް އެރި މަންޒަރު" ކްލޯއީ ބުންޏެވެ.

2013 ވަނަ އަހަރު ކްލޯއީގެ ކައިވެނި ރޫޅުނު ދުވަސްވަރު ހިނގި އެ ހާދިސާއަށްފަހު އޭނާ ވަނީ ފިޓްނަސްއަކީ އޭނާގެ ދިރިއުޅުމުގެ ބޮޑު ހިއްސާ އަކަށް ހަދާފަ އެވެ.

ކްލޯއީ ބުނީ އެއަށްފަހު އަލުން ތެރަޕީގެ އެހީ ހޯދަން އޭނާއަށް ހިތްވަރު ދިނީ އޭނާގެ ދައްތަ ކިމް ކާޑޭޝަން ކަމަށާއި އެ ލަފައަށް އަމަލު ކުރެވުނީތީ އުފާ ކުރާ ކަމަށެވެ.