ހޮލީވުޑްގެ ތަރި ޓޮމް ކްރޫޒްއާއި އޭނާގެ ކުރީގެ އަންހެނުން ކޭޓީ ހޯމްސްގެ ދަރިފުޅު ސޫރީ ކްރޫޒް އެއްފަހަރުން މިލިއަނަރަކަށް ވެއްޖެ އެވެ.

މިއަހަރުގެ ކުރީކޮޅު އުމުރުން 18 އަހަރު ފުރުނު ސޫރީ މިލިއަނަރެއްގެ ދަރަޖަ ހާސިލް ކޮށްފައި މިވަނީ އޭނާއަށްޓަކައި އޭނާގެ ބައްޕަ ހުޅުވާފައިވާ ޓްރަސްޓް ފަންޑެއް ލިބުމުންނެވެ.

ހަބަރުތައް ބުނާ ގޮތުގައި ޓޮމްއާއި ކޭޓީގެ ކައިވެނި ރޫޅުނުއިރު އުފައްދާފައިވާ އެ ޓްރަސްޓް ފަންޑްގެ ދަށުން މިވަގުތު ސޫރީއަށް ލިބެނީ އޭގެ އެއް ބަޔެވެ. ބާކީ ބައި ލިބޭނީ އޭނާގެ އުމުރުން 30 އަހަރު ފުރުމުންނެވެ.

ސޫރީގެ މައިންބަފައިންގެ އަގުބޮޑު މިލްކިއްޔާތާއެކު ކުރިއަށް އޮތް ތަނުގައި ވެސް އޭނާގެ މިލްކިއްޔާތު އަދިވެސް އިތުރުވާނެ ކަމަށް ލަފާ ކުރެވެ އެވެ.

މަޝްހޫރު ޝަހްސިއްޔަތުންގެ މިލްކިއްޔާތު ހާމަކުރާ ލިސްޓަށް ބަލާއިރު މިވަގުތު ޓޮމް ކްރޫޒްގެ މިލްކިއްޔާތުގައި 600 މިލިއަން ޑޮލަރު ހުރިއިރު ކޭޓީގެ މިލްކިއްޔާތަކީ 25 މިލިއަން ޑޮލަރެވެ.

މިވަގުތު ކޮލެޖު ތައުލީމު ހާސިލް ކުރަމުން އަންނަ ސޫރީ އޭނާގެ މިނިވަން ކަމަށް ފުރަތަމަ ފިޔަވަޅު އަޅާފައި ވިޔަސް އޭނާގެ ކޮލެޖު ފީ ވެސް ދައްކައިދެނީ ޓޮމް ކަމަށް ހަބަރުތައް ބުނެ އެވެ.