ސީރިއާގައި ހިންގަމުންދާ ހަމަނުޖެހުމަކީ އެމެރިކާއާ ބެހޭ މައްސަލައެއް ނޫން ކަމަށާއި އެ ގައުމުގެ މައްސަލައިގެ ތެރެއަށް އެމެރިކާއިން ނުވަންނާނެ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ ސީރިއާގެ ބައިގަރުނުވީ ޚުދުމުހުތާރު ވެރިޔާ ބައްޝާރުލް އަސަދުގެ ވެރިކަން މިއަދު ވައްޓާލުމާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގަ އެވެ.

ސީރިޔާގެ މައްސަލައާ ބެހޭ ގޮތުން ޓްރަމްޕް ވިދާޅުވީ ހަނގުރާމަވެރިން މިހާރު ސީރިއާގެ ވެރިކަން ކުރާ ސަރަހައްދު ދިމިޝްގާ ވަރަށް ކައިރިވެފައިވާ ކަމަށާއި އަދި ޔުކްރެއިންގެ ހަނގުރާމައިގައި ރަޝިއާއަށް ވަނީ 600,000 އަށް ވުރެ ގިނަ ސިފައިން ގެއްލިފައި ކަމަށް ޓްރަމްޕް ވިދާޅުވި އެވެ. އަދި މިކަމުގެ ސަބަބުން ސީރިއާގެ މައްސަލައަށް އެހީތެރިވުމަށް ރަޝިއާއަށް ދަތިވެފައިވާ ކަމަށް ވެސް ޓްރަމްޕް ކުރި ޕޯސްޓުގައި ވިދާޅުވެފައިވެ އެވެ.

މިއާއެކު އޭނާ ވިދާޅުވީ ސީރިއާގެ މައްސަލަ އަކީ ބޮޑު މައްސަލައެއް ނަމަވެސް އެ ގައުމަކީ އެމެރިކާގެ ރަހުމަތްތެރިއެއް ނޫން ކަމަށާއި އެއީ އެމެރިކާއާ ބެހޭ ކަމެއް ވެސް ނޫންކަމަށެވެ. އަދި އެއީ އަހަރެމެންގެ ހަނގުރާމައެއް ވެސް ނޫންކަމަށް ޓްރަމްޕް ބުންޏެވެ.

"ސީރިއާ މައްސަލަ އަކީ ބޮޑު ހައިޖާނެއް. އެކަމަކު އެއީ އަހަރެމެންގެ ރަޙްމަތްތެރިއެއް ނޫން. އެއީ އެމެރިކާއާ ބެހޭ ކަމެއް ވެސް ނޫން. އެއީ އަހަރެމެންގެ ހަނގުރާމައެއް ވެސް ނޫން. މިކަން ހިނގާދާނެ ގޮތަކަށް ހިނގަން ދޫކޮށްލާ. އެކަމުގައި ބައިވެރިނުވޭ." ޓްރަމްޕްގެ ޕޯސްޓްގައި ވިދާޅުވެފައިވެ އެވެ.

މިދިޔަ ނޮވެމްބަރު 27 ވަނަ ދުވަހު އިދިކޮޅު ފަރާތްތަކުންވަނީ ސަރުކާރުގެ ބާރު އޮތް ސަރަހައްދުތަކަށް ހަމަލާދީ، އެލެއްޕޯ، ހަމާ އަދި ދަރާ ފަދަ ބޮޑެތި ސިޓީތައް ހިފައިފަ އެވެ. މިހާރު އެ ފަރާތްތައް ވަނީ ވެރިރަށް ދިމިޝްގުގެ ކައިރިއަށް އާދެވިފަ އެވެ.

އެއާއެކު ބައްޝާރުގެ ވެރިކަން ނިމުނުކަން މިއަދު އިދިކޮޅު ފަރާތްތަކުން ވަނީ އިއުލާން ކޮށްފަ އެވެ.

2011 ވަނަ އަހަރު ފެށުނު މި ސީރިއާ ހަނގުރާމަ އަށް މިއަދަށް ބައިގަރުނު ވާން ކައިރިވެފައިވާއިރު، އެމެރިކާއިން ވަނީ ކުރްދީންގެ އިސްނެގުމުގެ ދަށުން ހިންގާ ސީރިއަން ޑިމޮކްރެޓިކް ފޯސަސް (އެސްޑީއެފް) އަށް އެހީތެރިކަން ފޯރުކޮށްދީފަ އެވެ.

އެހެން ނަމަވެސް މިއީ ޓްރަމްޕްގެ ވެރިކަމުގައި މި އެހީތެރިކަން ހުއްޓާލައިފާނެ ކަމުގެ އިޝާރާތެއް ކަމަށް ބެލެވޭކަމެއް ކަމަށް މަޝްރަހު ދިރާސާކުރާ ފަރާތްތަކުން ބުނެ އެވެ.