ސެލީނާ ގޯމޭޒްގެ އެންމެ ފަހުގެ ފިލްމު "އެމީލިއާ ޕެރޭޒް"ގައި އޭނާ ދައްކުވައިދިން އެކްޓިންއަށް އަމާޒުވި ފާޑުކިޔުންތަކަށް ސެލީނާ ރައްދު ދީފި އެވެ.

ޓީވީ ޝޯއެއްގައި ވާހަކަ ދައްކަމުން ހޮލީވުޑްގެ އެކްޓަރެއް ކަމަށްވާ އިއުޖީނިއޯ ދެރްބޭޒް ވަނީ އެ ފިލްމުގައި ސެލީނާގެ އެކްޓިންގެ ފެންވަރު ދަށްކަމަށް ބުނެ ވާހަކަ ދައްކާފަ އެވެ. އަދި އެ ފިލްމުގައި ސެލީނާ ސްޕެނިޝް ބަހުން ވާހަކަ ދެއްކުމުގައި ގިނަ ކުށްތަކެއް ހުރި ކަމަށް އިއުޖީނިއޯ ފާހަގަކޮށްފައިވެ އެވެ.

"އަހަރެމެން ފިލްމު ބަލަން ތިބިއިރު ފެންނަ ކޮންމެ މަންޒަރަކުން (އެކްޓިންގެ ފެންވަރު ދަށްކަމުން) އެކަކު އަނެކަކުގެ މޫނަށް ބަލާލެވޭ. މިވާހަކަ އެހެން ބަޔަކު ނުދައްކަނީ ކީއްވެ ކަމެއް ނޭނގެ،" އިއުޖީނިއޯ ބުންޏެވެ.

އިއުޖީނިއޯގެ އެ ވާހަކަތަކަށް ބާރުދެމުން ޝޯގެ ހޮސްޓް ބުނީ ސްޕެނިޝްއަކީ ސެލީނާގެ މާދަރީ ބަސް ނޫން ކަމަށާއި އެ ބަހުން ވާހަކަ ދައްކަން އޭނާ އެހާ ނުފަރިތައީ އެހެންވެ ކަމަށެވެ.

މިކަމާ ގުޅިގެން ސެލީނާ އޭނާގެ ސޯޝަލް މީޑިއާ މެދުވެރިކޮށް ބުނެފައިވަނީ ސްޕެނިޝް ބަހަށް ރަނގަޅަށް އިންސާފު ނުކުރެވުނީތީ ދެރަވާ ކަމަށާއި އެހެން ނަމަވެސް ލިބުނު މަދު ދުވަސްކޮޅުން އޭނާއަށް ވެވުނު އެންމެ ބޮޑަށް މަސައްކަތް ކޮށްފައިވާނެ ކަމަށެވެ.

ފިލްމުގައި ސްޕެނިޝް ބަހަށް ނުފަރިތަ ނަމަވެސް އެ ފިލްމަކީ އޭނާގެ ހިތާއި ރޫހުން ގަދައަޅާ މަސައްކަތްކުރި ފިލްމެއް ކަމަށާއި އެއީ ބަދަލު ނުވާނެ ކަމެއް ކަމަށެވެ.

ސެލީނާއަށް ވަނީ އެ ފިލްމުގައި އޭނާ ދައްކުވައިދިން އެކްޓިންއަށް "ކޭންސް ބެސްޓް އެކްޓްރެސް" އެވޯޑު ވެސް ލިބިފަަ އެވެ.