ބޮޑު ވަމުން އައި ދުވަސްވަރު ބައްޕަ ފެނުމުގެ ފުރުސަތު މާ ގިނައިން ނުލިބޭ ކަމަށް ބޮލީވުޑްގެ ތަރި ގޯވިންދާގެ ދަރިފުޅު ޓީނާ އަހޫޖާ ބުނެފި އެވެ.

ބޮލީވުޑް ބަބަލްއަށް ދިން އިންޓަވިއުއެއްގައި ޓީނާ ވަނީ ބޮލީވުޑްއާ ގުޅިފައިވާ އާއިލާއެއްގައި ބޮޑުވުމުގެ ތަޖުރިބާ އާއްމުކޮށް ހިއްސާކޮށްފަ އެވެ.

އެގޮތުން ޓީނާ ބުނީ އޭނާ ބޮޑުވަމުން އައި ދުވަސްވަރު ބައްޕަ ގޯވިންދާ އުޅުނީ މަސައްކަތުގައި ވަރަށް ބުރަކޮށް ކަމަށާއި ގިނަފަހަރަށް ބައްޕަ ކައިރީގައި ނޫޅޭ ކަމަށެވެ.

"ގިނަ މީހުންނަކަށް ނޭނގޭނެ. އެކަމަކު ބައްޕަ އަހަރެންގެ ސްކޫލުގެ އެއްވެސް ކަމަކަށް އައިސްފައެއް ނުވާނެ. ހުރިހާ ކަމެއްގައި އުޅުނީ މަންމަ" ޓީނާ ބުންޏެވެ.

ޓީނާ އިތުރަށް ބުނީ ބޮޑުވަމުން އައި ވަރަކަށް ގޯވިންދާއާއެކު ފިލްމުތަކުގެ ޝޫޓިންތަކަށް ދާން ފުރުސަތު ލިބުނު ކަމަށާއި އެއީ އޭނާ ވަރަށް ގަޔާވެގެން ކުރި ކަމެއް ކަމަށެވެ.

އެހެން ބޮލީވުޑް ތަރިންގެ ދަރިންނެކޭ އެއްފަދައިން މާ ގިނައިން ބޭރުތެރެއިން ނުފެންނަނީ ކީއްވެގެންތޯ ސުވާލު ކުރުމުން ޓީނާ ބުނީ ކަމަކާނުލާ ބޭރު ތެރެއިން ފެނުމަކީ އޭނާގެ "ޕްރައިވަސީ" ގެއްލޭ ކަމެއް ކަމަށެވެ.

90ގެ އަހަރުތަކުގައި ގިނަ ފިލްމުތަކެއް ކުޅުނު ގޯވިންދާގެ އާއިލާއަކީ އާއްމުކޮށް މީޑިއާއާ ވަރަށް ރައްޓެހި އާއިލާއެއްގެ ގޮތުގައި ފާހަގަކުރެވޭ އާއިލާ އެކެވެ.