ހުޅުމާލޭގައި މިރޭ މުޒާހަރާކުރި ބައެއް ޓެކްސީ ޓްރައިވަރުން ހައްޔަރުކޮށްފި އެވެ.

އެ ސަރަހައްދުގައި ހަރަކާތްތެރިވި ބައެއް މީހުން "ހުރިހާ"އަށް ކިޔައިދިންގޮތުގައި ބައެއް ޓެކްސީ ޑްރައިވަރިން ހައްޔަރުކުރީ ހުޅުމާލެއިން މާލެ ދަތުރުކުރާ ހައިވޭއަށް އަރާ ސަރަހައްދު ބަންދުކުރުމުން ކަމަށެވެ.

ސަރުކާރުން ޓެކްސީ ކުރަން ފެށުމާ ދެކޮޅަށް ޓެކްސީ ޑްރައިވަރުން މިއަދު މުޒާހަރާ ފެށީ ހުޅުމާލެ ރުއްގަނޑު ސަރަހައްދުގަ އެވެ. މިއަދު ހަވީރު 4:00 އިން ފެށިގެން ކުރިއަށްދިޔަ ސުލްހަވެރި މުޒާހަރާ ނިންމާލުމުގެ ގޮތުން ޓެކްސީ ޑްރައިވަރުން ވަނީ ހައިވޭއަށް އަރަން އޮންނަ މަގު ބަންދުވާ ގޮތަށް މަގު މެދުގައި ކާރުތައް ޕާކުކޮށްފަ އެވެ. އެކަމާ ގުޅިގެން ފުލުހުން ވަނީ އެ ސަރަހައްދަށްގޮސް ބައެއް ކާރުތައް ޓޯކޮށްފަ އެވެ.

އިހްތިޖާޖުގައި ހަރަކާތްތެރިވި ބައެއް ޓެކްސީތައް -- ފޮޓޯ: ހުރިހާ

މިކަމާ ގުޅޭގޮތުން ފުލުހުންގެ ރަސްމީ ބަހެއް އަދި ނިލިބެ އެވެ. ސަރުކާރުން ޓެކްސީ ކުރަން ފެށުމުން ޓެކްސީ ޑްރައިވަރުންނަށް ލިބެމުން އައި އާމްދަނީ ހުއްޓި ދިރިއުޅުމުގައި އެތަކެއް ދަތިތަކާ ކުރިމަތިލާންޖެހޭނެ ކަމަށް ޓެކްސީ ޑްރައިވަރުން އަންނަނީ ބުނަމުންނެވެ.