ސައޫދީ އަރަބިއާގައި ޖަމަލު ދުއްވުމުގެ މުބާރާތެއް ބާއްވަން ނިންމައި އެ މުބާރާތުގެ އެއްވަނަ އިނާމަކަށް ޕްރައިވެޓް ޖެޓެއް ހުށައަޅައިފި އެވެ.

މި މުބާރާތް ބާއްވާނީ މިމަހުގެ ފަހުކޮޅު ކުރިއަށްދާ ނުވަވަނަ ކިންގް އަބްދުލްއަޒީޒް ޖަމަލު ފެސްޓިވަލްގެ ތެރެއިން ކަމަށް ހަބަރުތައް ބުނެ އެވެ.

ސައޫދީގެ ޖަމަލު ދުއްވުމުގެ މުބާރާތް އިންތިޒާމުކުރާ ކެމަލް ކްލަބުގެ ޗެއާމަން ފަހަދު ބިން ހަތުލީން ވިދާޅުވީ އެހާ އަގުބޮޑު އިނާމެއް އެއްވަނައަށް ހުށައެޅީ މުބާރާތުގެ ޝަރަފު މަތިވުމުން ކަމަށެވެ.

އެއްވަނައަށް ދާ ފަރާތަކަށް ލިބޭ ޕްރައިވެޓް ޖެޓުގެ އިތުރުން މުބާރާތުގެ ބާނީއާ ބައްދަލު ކުރުމުގެ ފުރުސަތު ވެސް ލިބޭނެ ކަމަށް ފަހަދު ވިދާޅުވި އެވެ.

ޖަމަލަކީ ސައޫދީ އަރަބިއާގެ ސަގާފަތާ ގުޅިފައިވާ ޖަނަވާރަކަށްވާއިރު އެކަން ކުރިއަރުވަން އެ ގައުމުން އަންނަނީ ގިނަ މަސައްކަތްތަކެއް ކުރަމުންނެވެ.

އެގޮތުން ކޮންމެ އަހަރަކު ވެސް "ކެމަލް ފެސްޓިވަލްގެ" ނަމުގައި އެގައުމުގައި ކުލަގަދަ ހަރަކާތެއް ބާއްވާކަން ފާހަގަކޮށްލެވެ އެވެ.